د وېنزوېلا حکومت د امریکا لهخوا په نړۍوالو اوبو کې د تېلو د یوې بېړۍ د نیول کېدو په غبرګون کې دغه اقدام «نړۍواله سمندري غلا» وبلله او اعلان یې وکړ، چې دا موضوع به د ملګرو ملتونو د امنیت شورا او نورو نړۍوالو بنسټونو له لارې تعقیب کړي.
د وېنزوېلا حکومت د شنبې په ورځ په یوه رسمي اعلامیه کې د امریکا لهخوا د دغه هېواد ساحلونو ته نږدې د تېلو د یوې بېړۍ نیول په کلکه وغندل او خبرداری یې ورکړ، چې «دا ډول اقدامات به بېځوابه پاتې نهشي». کاراکاس اعلان کړی، چې ټول حقوقي او ډیپلوماټیک انتخابونه لکه د ملګرو ملتونو د امنیت شورا او نورو څو اړخیزو بنسټونو ته د شکایت وړاندې کول هم پکې شامل دي، چې تر ارزونې لاندې دي.دغه غبرګون تر هغه وروسته راڅرګند شو، چې د امریکا د کورني امنیت وزیرې کریسټي نوم د شنبې په ورځ (د لیندۍ ۲۹مه) په خپله اېکسپاڼه وویل، د امریکا ګډو ځواکونو د تېلو یوه بېړۍ چې په وېنزوېلا کې یې لنګر اچولی و، د دغه هېواد ساحل ته نږدې راګرځولې ده.دا اقدام په داسې حال کې شوی، چې څو ورځې وړاندې د امریکا ولسمشر ډونالډ ټرمپ اعلان وکړ، چې د ټولو هغو تحریم شویو د تېلو بېړیو پر وړاندې «بشپړ محاصره» عملي کېږي، چې وېنزوېلا ته داخلیږي یا له دې هېواد څخه وځي.
