طالبان وایي د کابل څلورمه حوزه کې یې لسګونه زره نشهيي ګولۍ نیولي
د طالبانو د کورنیو چارو وزارت وايي، د کابل امنیه قوماندانۍ اړوند د څلورمې حوزې پولیسو یې د نشهيي توکو پر ضد د عملیاتو پر مهال لسګونه زره نشهيي ګولۍ کشف او ضبط کړې دي.
د طالبانو د کورنیو چارو وزارت وايي، د کابل امنیه قوماندانۍ اړوند د څلورمې حوزې پولیسو یې د نشهيي توکو پر ضد د عملیاتو پر مهال لسګونه زره نشهيي ګولۍ کشف او ضبط کړې دي.
د دغه وزارت په خبرپاڼه کې راغلي، د کابل امنیه قوماندانۍ د څلورمې حوزې پولیسو د همدې حوزې په مربوطاتو کې ۳۳ زره د «زیکپ» په نوم نشهيي ګولۍ نیولي دي.
په خبرپاڼه کې راغلي، چې دغه نشهيي توکي د پولیسو د کشفي عملیاتو پر مهال موندل شوي او په تړاو یې یو کس هم د امنیتي ځواکونو لهخوا نیول شوی دی.
د کورنیو چارو وزارت زیاته کړې، چې د نشهيي توکو د قاچاق او وېش پر ضد مبارزه به دوام ولري او نیول شوی کس به د قانوني څېړنو وروسته عدلي ارګانونو ته وسپاري.
