تایلنډ او کمبودیا د دوشنبې په ورځ هوکړه وکړه چې د ډسمبر پر ۲۴مه د دواړو هېوادونو د دفاعي چارواکو په غونډه کې د هغه اوربند پر غځولو خبرې وکړي، چې له څو میاشتو راهیسې مات شوی دی. د دواړو هېوادونو ترمنځ سرحدي جګړې درېیمې اونۍ ته ننوتې دي او تر دې دمه لږ تر لږه ۸۰ کسان پکې وژل شوي.
دغه پرېکړه په کوالالمپور ښار کې د جنوب ختیځې اسیا د بهرنیو چارو د وزیرانو په ځانګړې غونډه کې شوې ده.
د دفاعي چارواکو د غونډې پرېکړه د جګړې له بیا پیل وروسته تر ټولو مهم پرمختګ بلل کېږي، ځکه نه د مالیزیا لومړي وزیر انور ابراهیم او نه هم د امریکا ولسمشر ډونالډ ټرمپ وتوانېدل چې په دې پړاو کې دواړه هېوادونه د خبرو مېز ته راولي.
د جګړې له پیل پنځه ورځې وروسته ټرمپ ویلي وو چې د تایلنډ او کمبودیا لومړي وزیران د ډزو پر بشپړ درولو هوکړې ته رسېدلي دي، خو نښتو بله ورځ هم دوام وکړ. تایلنډ هوايي بریدونه زیات کړل او ټینګار یې وکړ چې جګړه به روانه ساتي.
چین هم پر دواړو لوریو فشار راوړی چې شخړه کمه کړي.
د تایلنډ د بهرنیو چارو وزیر سیهاساک فوانګکیتکيو ویلي چې هېواد یې یو ریښتینی اوربندغواړي، داسې اوربند چې د عملي کېدو روښانه پلان او د کمبودیا جدي ژمنتیا ولري.
