د امریکا د استخباراتو راپورونه لا هم خبرداری ورکوي چې د روسیې ولسمشر ولادیمیر پوتین د اوکراین د بشپړ نیولو له موخو او د اروپا د هغو برخو د بېرته ترلاسه کولو له ارادې نه دی تېر شوی چې پخوا د شوروي اتحاد برخه وې.
دا خبره رویټرز ته شپږو سرچینو کړې چې د امریکا له استخباراتي معلوماتو خبرې دي.
دغه راپورونه له هغه انځور سره په څرګند ډول توپیر لري چې د امریکا ولسمشر ډونالډ ټرمپ او د هغه د سولې مرکچیان یې وړاندې کوي، ځکه هغوی ویلي چې پوتین غواړي جګړه پای ته ورسوي.
دا استخباراتي ارزونې د روسیې د مشر هغه انکارونه هم ردوي چې وایي اروپا ته ګواښ نه دی.
د امریکا د کانګرس د استخباراتو کمېټې دیموکرات غړي مایک کویګلي رويټرز ته په مرکه کې وویل، « استخبارات تل دا ښيي چې پوتین نور څه هم غواړي. اروپایان پرې قانع دي. پولنډیان په بشپړه توګه قانع دي. بالتیک هېوادونه فکر کوي چې دوی به لومړني هدف وي».
د سپینې ماڼۍ یوه چارواکي، پرته له دې چې استخباراتي راپورونو ته اشاره وکړي، وویل، « ولسمشر ټیم د جګړې د پای ته رسولو په برخه کې ډېر پرمختګ کړی دی»، او ټرمپ ویلي چې د سولې تړون «تر بل هر وخت ډېر نږدې» دی.
د شنبې په ورځ د امریکا د ملي استخباراتو رییسې تولسي ګابارډ وویل چې استخباراتي چارواکو قانون جوړوونکو ته معلومات ورکړي چې «روسیه غواړي له اروپا سره د یوې پراخې جګړې مخه ونیسي».
د دوشنبې په ورځ، د کرملین ویاند دمیتري پېسکوف وویل چې مسکو نه پوهېږي رويټرز کومو سرچینو ته اشاره کړې، خو که راپور سم وي، نو د امریکا استخباراتي پایلې ناسمې دي.
