د امریکا د دفاع وزارت د یوې مسودې له مخې، چین ښايي د توغندیو په دریو اډو کې تر سلو زیات قاره وېشتونکي بالیسټیک توغندي ځای پر ځای کړي وي. مسوده وايي، بیجنګ د وسلو د کنټرول په تړاو خبرو اترو ته هېڅ لېوالتیا نه لري.
رویټرز د پنټاګون د مسودې د راپور له مخې وايي، چین د هر بل اټومي وسله لرونکي هېواد په پرتله د خپلو وسلو زېرمتون په چټکۍ سره پراخوي او عصري کوي، خو بیجینګ بیا د پوځي پراختیا راپورونه رد کړي او ویلي یې دي، چې دا ډول راپورونه د «چین د بدنامولو، تور لګولو او د نړیوالې ټولنې د قصدي ګمراه کولو هڅې» دي.
تېره میاشت د امریکا ولسمشر ډونالډ ټرمپ ویلي وو، چې ښايي له چین او روسیې سره د اټومي وسلو د کمولو یا بېوسلې کېدو پر یوه پلان کار وکړي، خو د پنتاګون دغه مسوده ، چې رويټرز لیدلی، څرګندوي چې چین دا ډول خبرو اترو ته لېواله نه ښکاري.
راپور وايي: «موږ لا هم له بیجینګ څخه د دې ډول اقداماتو یا د وسلو د کنټرول د پراخو خبرو لپاره هېڅ لېوالتیا نه وینو».
د راپور له مخې، چین ښايي د منګولیا پولې ته نږدې په نویو جوړو شویو توغندیزو اډو کې تر سلو ډېر د جامد سونګ DF-31 ډوله قارهوېشتونکي بالیسټیک توغندي ځای پر ځای کړي وي.
پنتاګون تر دې وړاندې د دغو اډو شته والی تایید کړی و، خو د توغندیو دقیق شمېر یې نه و څرګند کړی.
پنتاګون او په واشنګټن کې د چین سفارت تر دې دمه د تبصرې غوښتنې ته ځواب نه دی ویلی.
په راپور کې د دغو نویو ځای پر ځای شویو توغندیو احتمالي هدف نه دی مشخص شوی او امریکایي چارواکو ویلي چې دا راپور د کانګرس غړو ته تر سپارل کېدو وړاندې بدلېدای شي.
د راپور له مخې، د چین د اټومي خولیو شمېر په ۲۰۲۴ کال کې لا هم د ۶۰۰ شاوخوا دی، چې دا د تېرو کلونو په پرتله د تولید د ورو سرعت ښکارندویي کوي. خو راپور زیاتوي، چې د چین اټومي پراختیا روانه ده او تمه ده چې تر ۲۰۳۰ کال پورې به د دغه هېواد اټومي خولۍ له زرو واوړي.
چین ویلي، چې د «ځاني دفاع اټومي ستراتیژي» تعقیبوي او د «لومړي برید نه کولو» تګلاره لري.
ډونالډ ټرمپ بیا ویلي، چې غواړي امریکا یو ځل بیا د اټومي وسلو ازموینې پیل کړي، خو دا لا روښانه نه ده چې دا کار به په څه ډول ترسره شي.
د پنتاګون پراخ راپور د چین پوځي پراختیا ته په اشارې وايي، چې بیجینګ تمه لري تر ۲۰۲۷ کال پورې د تایوان پر وړاندې جګړه پیل کړي او بریا ترلاسه کړي.
چین، چې دیموکراتیک اداره کېدونکی تایوان د خپلې خاورې برخه ګڼي، هېڅکله د دې ټاپو د «بیا یوځای کولو» لپاره د زور کارول نه دي رد کړي.
راپور زیاتوي، چې بیجینګ د تایوان د نیولو لپاره د «زور له لارې» پوځي انتخابونه اصلاح کوي، چې ښايي د چین له خاورې ۱۵۰۰ تر ۲۰۰۰ سمندري میله لرې هدفونو باندې بریدونه هم پکې شامل وي.
راپور وايي: «که دا ډول بریدونه په کافي کچه ترسره شي، نو کولای شي د اسیا-پاسیفیک په سیمه کې د احتمالي جګړې پر مهال د امریکا حضور له جدي ننګونې سره مخ او ګډوډ کړي».
