د انګلستان کرېکټ بورډ ویلي، چې دوی به د اسټرالیا پر وړاندې د دویمې او درېیمې ټېسټ لوبې ترمنځ د وقفې پر مهال د ملي لوبډلې د لوبغاړو د زیات الکولو څښلو راپورونه وڅېړي. ځینو رسنیو د انګلستان د ماتې یو له اصلي لاملونو د لوبغاړو د الکولو زیات مصرف بللی دی.
د رویټرز د راپور له مخې، اسټرالیا د یکشنبې په ورځ په اډلایډ کې د انګلستان پر وړاندې درېیمه ټېسټ لوبه د ۸۲ منډو په توپیر وګټله او په دې لړۍ کې یې انګلستان ته ماتې ورکړه.
د لوبې له پیل وړاندې، د انګلستان لوبډله د پرټ او بریزبن کې د اسټرالیا پر وړاندې د سختو ماتو له امله د تفریح او ارام لپاره نوسا ښار ته تللې وه. برېتانوي او اسټرالیايي رسنیو راپور ورکړی، چې د رخصتیو پر مهال د انګلستان لوبغاړو زیات الکول څښلي دي.
د انګلستان د ملي لوبډلې مدیر راب کي بيبيسي ته وویل: «ځینې وختونه سرلیکونه مغشوش کوونکي وي. که دا خبره رښتیا وي چې لوبغاړو شپږ ورځې پرلهپسې الکول څښلي، نو دا هېڅ ډول د منلو وړ نهده.»
هغه زیاته کړه، چې فدراسیون د حقایقو د معلومولو په لټه کې دی او باید د انځورونو یا مبالغې ډک راپورونو پر بنسټ قضاوت ونه شي. نوموړي ټینګار وکړ، چې د ملي لوبډلې په کلتور کې د الکولو څښل د منلو وړ نه دي.
د انګلستان د ملي لوبډلې مدیر همداراز وویل، که دا ثابته شي چې یاده وقفه د بېباکه تفریح او دوامدار الکول څښلو لپاره کارول شوې، نو دا ډول چلند هېڅ ډول د منلو وړ نه دی.
له دې مخکې د دې لوبلړۍ په پيل کې راب کي د انګلستان له لوبغاړو غوښتنه کړې وه، چې له «بېمسوولیت چلند» ډډه وکړي. د دې لړۍ څلورم ټېسټ لوبه به د جمعې په ورځ په ملبورن کې تر سره شي.
