په بلخ کې د طالبانو والي یوسف وفا د افغانستان لپاره د قزاقستان له سفیر ګازیز اکباسوف سره په کتنه کې د دواړو هېوادونو ترمنځ د سوداګریزو، اقتصادي او بشري همکاریو د پراختیا په اړه خبرې وکړې. اکباسوف ژمنه وکړه، چې قزاقستان غواړي په افغانستان کې یو معیاري ۲۰۰ بستریز روغتون جوړ کړي.
د بلخ ولایت مقام د رسنیو مرکز د چهارشنبې په ورځ (د مرغومي ۳مه) په یوې خبرپاڼه کې ویلي، وفا له اکباسوف سره په خبرو کې زیاته کړې چې افغانستان له نږدې څلورو لسیزو جګړو وروسته د بیا رغونې او اقتصادي ودې نوي پړاو ته داخل شوی او دوی هڅه کوي، چې د روغتیايي خدمتونو د پیاوړتیا ترڅنګ معیاري ښوونځي هم جوړ کړي.
په خبرپاڼه کې د یوسف وفا له قوله همداراز ویل شوي، چې دا ډول پروژې به د افغانانو روغتیايي او علمي ستونزې راکمې کړي او د افغانستان او قزاقستان ترمنځ به د بشردوستانه همکاریو نوی فصل پرانیزي.
د خبرپاڼې پربنسټ، د قزاقستان سفیر هم د افغانستان د بیا رغونې له هڅو ملاتړ څرګند کړی او ویلي یې دي، چې هېواد یې چمتو دی څو د روغتیا، پوهنې او پانګونې په برخو کې له افغانستان سره همکاري پراخه کړي.
د یادونې وړ ده، چې د دغه سفر موخه د افغانستان او قزاقستان ترمنځ د سوداګریزو اړیکو پیاوړتیا، د سوداګریز ګردش د زیاتولو لپاره عملي ګامونه او په افغانستان کې د پانګونې لپاره د شته فرصتونو ارزونه بلل کېږي.
