ماریا زاخارووا: د اوکراین جګړې د حل په خبرو کې ورو خو دوامدار پرمختګ شوی
د روسیې د بهرنیو چارو وزارت ویاندې ماریا زاخارووا ویلي، چې د اوکراین جګړې د حل په تړاو له امریکا سره په روانو خبرو کې ورو خو ثابت پرمختګ لیدل کېږي.
د روسیې د بهرنیو چارو وزارت ویاندې ماریا زاخارووا ویلي، چې د اوکراین جګړې د حل په تړاو له امریکا سره په روانو خبرو کې ورو خو ثابت پرمختګ لیدل کېږي.
نوموړې نن د پنجشنبې په ورځ څرګنده کړه، چې د اوکراین د شخړې د هواري لپاره د خبرو اترو بهیر، په ځانګړي ډول له متحده ایالاتو سره، که څه هم ورو روان دی، خو دوامدار پرمختګ پکې شته.
زاخارووا همداراز زیاته کړه، چې د لوېدیزې اروپا یو شمېر هېوادونه هڅه کوي دا پرمختګونه شنډ کړي. د هغې په ادعا، دا هېوادونه د سولې د بهیر پر وړاندې خنډونه جوړوي او نه غواړي چې خبرې بریالۍ پایلې ته ورسېږي.
د روسیې د بهرنیو چارو وزارت ویاندې له امریکا وغوښتل، چې د اروپا د دغو هڅو پر وړاندې ودرېږي او اجازه ور نه کړي چې د سولې روانې هڅې زیانمنې شي.
تر اوسه د امریکا او اروپايي هېوادونو له لوري د زاخارووا د څرګندونو په اړه رسمي غبرګون نه دی خپور شوی، خو اروپايي ټولنه روسیه تورنوي، چې د اوکراین په اړه ښه نیت نه لري.
