د طالبانو سترې محکمې خبر ورکړی، چې د کابل ولایت اړوند په چهار اسیاب ولسوالۍ کې نیول شوي ۶۵ کیلو انساني وېښتیان یې سوځولي دي. د یادې محکمې په وینا؛ دغه اندازه وېښتان د یادې ډلې د یو لړ عملیاتو پرمهال نيول شوي وو، چې وروسته يې دوسیه محکمې ته راجع شوه.
د طالبانو د سترې محکمې لهخوا د پنجشنبې په ورځ (د مرغومي ۴مه) په خپرې شوې خبرپاڼه کې راغلي:« د انسان د وېښتانو ناقانونه راټولول او ساتل غیر شرعي او غیرقانوني عمل دی او ورته قضيې به په راتلونکې کې هم تعقيب او وڅېړل شي.» طالبانو تر دې وړاندې د جلالاباد ښار په ګډون د ننګرهار په شپږو ولسوالیو کې د شاوخوا ۱۰۰۰ کیلو ګرامه انساني وېښتیانو د نیولو او سوځولو خبر ورکړی و.
افغانستان انټرنشنل-پښتو ته د سیمهییزو سرچینو رسېدلي راپورونه څرګندوي، چې په هېواد کې یو شمېر کسان انساني او په ځانګړې توګه د ښځینهوو وېښتان پېري او له هغه وروسته یې پاکستان ته صادروي. پاکستان بیا دغه وېښتان په عمده ډول د چين په څېر هېوادونو ته صادروي او هغوی بیا د مصنوعي وېښتانو او خولیو په جوړولو کې ترې کار اخلي.
