د طالبانو سوداګرۍ وزارت په زابل او غزني ولایتونو کې دوه صنعتي پارکونه جوړوي

د طالبانو د بلخ ولایت مستوفیت اعلان کړی چې د عباس ابراهیم‌زاده او د هغه د زامنو اړوند ۶۴جایدادونه د داوطلبۍ له لارې د کرایې لپاره وړاندې کېږي.

دغه جایدادونه د بلخ ولایت په بېلابېلو سیمو کې موقعیت لري، چې کارته اریانا، کارته سینا، کارته نورخدا، کارته میرتان، شهرک حیرتان، پل خوابي سلمان فارس، قلعه میر نواباد، سیداباد، د مزار شریف لویې لارې مسیر او د استقلال عالي لیسې سړک پکې شامل دي.

په یادو جایدادونو کې مارکیټونه، سرایونه، هټۍ، بلاکونه، حویلۍ، مېلمستونونه، روغتونونه، ښونیز مرکزونه، تولیدي فابریکې، کرنیزې ځمکې، د غیرالکولي مشروباتو فابریکې او نور تجارتي او استوګنیز ملکیتونه شامل دي.

یاد جایدادونه د عباس ابراهیم زاده او د هغه د زامنو، غلام محمد، فدا محمد او نجیب الله په نومونو ثبت دي.

سرچینو افغانستان انټرنشنل ته ویلي، چې عباس ابراهیم زاده یاد جایدادونه له خلکو پیرلي او خلکو ته یې د جایدادونو یوازې ۱۰ سلنه پیسې ورکړې دي او ۹۰ سلنه یې نه دي ورکړې.

د سرچینو د معلوماتو له مخې، عباس ابراهیم زاده، چې په عباس ډالر هم مشهور دی، ځینې جایدادونه په زور له خلکو اخیستي وو او پر نوموړي تور دی، چې د ځینو جایدادونو اصلي خاوندان یې وژلي هم دي.

عباس ابراهیم زاده د جمهوري نظام له پرځېدو وروسته ازبکستان ته لاړ، خو د راپورونو له مخې نوموړی له څه باندې یوې میاشتې راهیسې په یاد هېواد کې زنداني دی.

لس ورځې وړاندې د عباس ابراهیم زاده پر فیسبوک پاڼې د نوموړي د زوی په ادرس لیکل شوي، چې ابراهیم زاده د خپلو سوداګریزو او سیاسي رقیبانو په یوه دسیسه کې زنداني شوی دی.

د نوموړي زوی د ازبکستان له حکومت او طالبانو څخه د خپل پلار د خوشې کېدو په برخه کې د همکارۍ غوښتنه کړې ده.

د طالبانو د بهرنیو چارو وزارت نن د یکشنبې په ورځ، د مرغومي اوومه ویلي، چې امیرخان متقي د افغانستان لپاره د امریکا پخواني ځانګړي استازي زلمي خلیلزاد سره لېدنه کې ویلي، چې له افغانستان نه د بهرنیو ځواکونو له وتلو او جګړې پای ته رسېدو وروسته د طالبانو او امریکا تعامل عملاً نوي پړاو ته داخل شوی.

امیرخان متقي زیاته کړې، چې په ګڼو برخو کې د دواړو هېوادونو ترمنځ د اړیکو د پراختیا فرصتونه شته چې د دوامداره خبرو له لارې پرې کار کېدلای شي.

طالبانو ویلي، چې زلمي خلیلزاد په افغانستان کې امنیت او د بیارغونې په برخه کې د پرمختګونو ستاینه کړې او د طالبانو او امریکا ترمنځ یې خبرې اترې مهمې بللې دي.

زلمی خلیزاد تردې وړاندې هم د طالبانو له خوا د امریکايي بندیانو د ورسپارلو په موخه له امریکايي چارواکو سره افغانستان ته سفرونه کړي وو.

د ملګرو ملتونو د بشري میشتونې یا یو اېن هبیتات پروګرام نن یکشنبه، د مرغومي پر ۷مه، د کابل پر هغو اوسیدونکو د اقلیم د بدلون د اغیزو په اړه خبرداری ورکړی، چې په بې نقشې یا له ښاري پلان نه بهر غیر رسمي سیمو کې اوسیږي.

یو اېن هبیتات دغه راز ویلي، چې په کابل کې شاوخوا ۴۰ سلنه ښاري نفوس ژوند کوي.

یاد سازمان له دې وړاندې ویلي و، چې د نفوس د ودې او له ګاونډیو هیوادونو څخه د افغان کډوالو د لویې کچې راستنیدنې له امله په کابل کې غیر رسمي او متراکم میشت ځایونه په چټکۍ پراخیږي.

په ورته وخت کې د افغان تحلیلګرانو شبکې په خپل وروستي رپوټ کې ویلي دي، چې د کورجوړونې په تړاو د طالبانو نویو مقرراتو هم بېکاري ډېره کړې او د کورونو بحران یې ژور کړی دی.

رپوټ وايي، چې د ځمکې پراختیا او ودانیز سکتور په کابل کې د دوو جمهوري دورو تر ټولو ګټور اقتصادي سکتور و، خو د ودانیزو پروژو ډېری برخې له قانون سره سمون نه درلود.

د کابل شاوخوا ۸۰ سلنه اوسېدونکي یوازې عرفي قبالې لري، چې طالبان یې نه مني. دا خلک نه شي کولای نوي کورونه جوړ کړي او نه هم خپلې شته ودانۍ پراخولای شي.

په رپوټ کې ویل شوي، حتا هغه کسان چې شرعي قبالې لري، د ملکیت د تثبیت، اداري ځنډ، او د فساد د ادعاوو له امله د ودانۍ جواز ته په میاشتو او ان کلونو انتظار باسي.

په کابل کې د نفوس تراکم تر ځمکې لاندې اوبو د کمېدو له ناورین سره مل دی، ځکه نړیوالو ادارو له دې وړاندې خبرداری ورکړی، چې تر ۲۰۳۰ مو کلونو پورې به د کابل تر ځمکې لاندې اوبه وچې شي.

د طالبانو د مالیې وزارت ویاند عبدالقیوم نصیر د یوه غږیږ پیغام په خپرولو سره وویل، چې «د امارتي ادارو د معاشونو د ځنډ په اړه وروستی اوازې ناسمې دي. د مالیې وزارت بشپړ چمتووالی لري، چې له ټولو ادارو څخه د معاشونو راپور ترلاسه کولو وروسته په راتلونکې اونۍ کې معاشونه حواله کړي.»

سرچینو افغانستان انټرنشنل ته ویلي، چې د طالبانو د مالیې وزارت تر اوسه د تیرې لېندۍ میاشتې معاشونه نه دي حواله کړي او د دولتي ادارو مامورین د ژمي په دې سړه هوا کې تر بل هر وخت ژر د معاشونو ترلاسه کولو ته اړتیا لري.

تېرکال هم د طالبانو مالیې وزارت د کابو دوو میاشتو لپاره د دولتي ادارو معاشونه ځنډولي وو او هغه مهال یې د ځنډ لامل د مالي کال د پیل په تړاو د ادارو د بودجې ټاکل او اصلاح ښودلی و.

د افغانستان بانک د یکشنبې په ورځ وویل، چې د بانکي محرمیت د ساتنې په موخه به د مالیې وزارت د مالیاتو په تړاو د بانکي حسابونو او د راکړې ورکړې اسناد په مستقیم ډول له بانکونو څخه نه غواړي، بلکې اړین معلومات به یوازې د شرکتونو او مالیه ورکوونکو له لارې ترلاسه کېږي.

د بانک په وینا، که د اسنادو د تصدیق ته اړتیا وي، دغه اسناد به افغانستان بانک ته لېږل کېږي او تصدیق به یې هم دغه بانک کوي.

د بانک په وینا، دغه راز پرېکړه شوې، چې بانکي اسناد به د سوداګریزو عوایدو د مالیې د مستقیمې محاسبې بنسټ نه ګرځي، بلکې د دې مالیې محاسبه به د مسلکي او خپلواکې پلټنې له لارې کېږي چې د مالیې وزارت له لوري ټاکل کېږي او په مستقیم ډول به له شرکتونو او سوداګرو سره ترسره کېږي.

د یادو پرېکړو له مخې، د بانکي حسابونو د بشپړ بندېدو د مخنیوي لپاره به د طالبانو د مالیې وزارت د شرکتونو د ټولو حسابونو د بندولو پر ځای یوازې د پاتې مالیې اندازه د افغانستان بانک ته لېږي او افغانستان بانک به هم یوازې همغه ټاکلې اندازه په اړوند حساب کې کنګل کوي، چې د شرکتونو سوداګریز فعالیتونه له خنډ سره مخ نه شي.

د بانک له خوا په خپره شوې خبرتیا کې ویل شوي، چې که کوم شرکت خپل مالیاتي حسابونه تصفیه نه کړي، د طالبانو د مالیې وزارت کولای شي د تېر کال د مالیې پر بنسټ په لس سلنې زیاتوالي سره د شرکت مالیه محاسبه او همغه اندازه کنګل کړي.

د افغانستان بانک ویلي چې دا خبرتیا د یادو پرېکړو د اغېزناک تطبیق او د عامه پوهاوي په موخه خپرېږي او له ټولو بانکونو، شرکتونو، سوداګرو او اړوندو ادارو څخه غوښتنه شوې چې د نویو پرېکړو له مخې لازمې همکارۍ ترسره کړي.