د طالبانو د مالیې وزارت ویلي، چې د دولتي ادارو د معاشونو د ځنډ او خنډ په اړه «ټولې اوازې ناسمې دي» او یاد وزارت چمتو دی، چې له دولتي ادارو څخه د معاشونو د راپور ترلاسه کولو وروسته، مامورانو ته معاشونه ورکړي.
د طالبانو د مالیې وزارت ویاند عبدالقیوم نصیر د یوه غږیږ پیغام په خپرولو سره وویل، چې «د امارتي ادارو د معاشونو د ځنډ په اړه وروستی اوازې ناسمې دي. د مالیې وزارت بشپړ چمتووالی لري، چې له ټولو ادارو څخه د معاشونو راپور ترلاسه کولو وروسته په راتلونکې اونۍ کې معاشونه حواله کړي.»
سرچینو افغانستان انټرنشنل ته ویلي، چې د طالبانو د مالیې وزارت تر اوسه د تیرې لېندۍ میاشتې معاشونه نه دي حواله کړي او د دولتي ادارو مامورین د ژمي په دې سړه هوا کې تر بل هر وخت ژر د معاشونو ترلاسه کولو ته اړتیا لري.
تېرکال هم د طالبانو مالیې وزارت د کابو دوو میاشتو لپاره د دولتي ادارو معاشونه ځنډولي وو او هغه مهال یې د ځنډ لامل د مالي کال د پیل په تړاو د ادارو د بودجې ټاکل او اصلاح ښودلی و.
