په کابل کې د ایران سفير عليرضا بیکدلي، د طالبانو د معادن او پټرولیم وزیر هدایتالله بدري سره په لیدنه کې، د افغانستان د اوسپنې او تیلو کانونو کې د ایران د پانګونې وړاندیز وکړ. په لیدنه کې، د ایران سفیر د افغانستان کانونه د دواړو هیوادنو د همکارۍ پراختیا لپاره مناسبه زمینه وبلله.
د طالبانو د معادن او پټرولیم وزارت د شنبې ورځ(د مرغومي ۶مه) په خبرپاڼه کې لیکلي چې په دې لیدنه کې د اقتصادي همکارۍ د پیاوړتیا، دوه اړخیزو اړیکو د پراختیا او د افغانستان د کانونو په سرچینو کې د پانګونې په اړه خبرې شوي دي.
د خبرپاڼې له مخې، د ایران سفیر وویل چې ایراني شرکتونه د افغانستان د اوسپنې او تیلو کانونو کې د پانګونې لپاره چمتو دي.
د طالبانو د معادن او پټرولیم وزارت وايي چې هدایتالله بدري د ایران د شرکتونو د پانګونې د چمتووالي هرکلی وکړ او له دغه هیواد سره یې د همکاریو ژمنه ورکړه.
ایران که څه هم طالبان په رسميت نه پېژني، خو له دغې ډلې سره پراخې ډېپلوماټیکې او اقتصادي اړیکې لري.
محمود سیادت، د ایران او افغانستان د سوداګرۍ خونې مشر، مخکې ویلي وه چې په افغانستان کې د امنیتي وضعیت ښه والي سره، د پانګونې زمینه په ځانګړي ډول په کانونو کې برابره شوې ده. هغه ویلي چې د قطري، ترکي او چینایي شرکتونو فعالیتونه په زیاتېدو دي او د ایران نړیوال سیالان هڅه کوي چې د دې بازار په ترلاسه کولو کې یو تر بل مخکې شي.
