طالبان وايي په هرات کې یې ۱۶۰ پخواني معتادان د قران کریم حافظان کړل
په هرات ولایت کې د طالبانو اړوندو مسوولینو ویلي، چې په نشه يي توکو ۱۶۰روږدي کسان تر درملنې او د تجوید او د قران کریم د سم لوست له زدهکړې وروسته، د قران حافظان شول.
په هرات ولایت کې د طالبانو اړوندو مسوولینو ویلي، چې په نشه يي توکو ۱۶۰روږدي کسان تر درملنې او د تجوید او د قران کریم د سم لوست له زدهکړې وروسته، د قران حافظان شول.
طالب چارواکي وايي، د دغو پروګرامونو موخه دا ده چې هغه کسان چې کلونه یې له اعتیاد سره تېر کړي، د دیني علومو، معنوي زدهکړو او اخلاقي روزنې له لارې بېرته ټولنې ته د سالمو او روزل شویو وګړو په توګه ستانه کړي.
هرات کې د طالبانو محلي چارواکي وايي، دا مهال شاوخوا زر تنه پخواني معتادان د فني او حرفوي مسلکونو، دیني علومو او عمومي زدهکړو په برخو کې په زدهکړو بوخت دي.
د طالبانو تر واک لاندې کابل ښاروالي وايي، چې په ښار کې د ترافیکي ګڼه ګوڼې د کمولو په موخه د ولایت مقام مخې ته د ۴۶۲ میلیونه افغانیو په ارزښت د موټرو لپاره د هوايي پله د جوړولو چارې پیل شوې دي. د ښاروالۍ په وینا، دغه پل ۲۳۵ متره اوږدوالی، ۱۸ متره سور او ۶،۸ متره لوړوالی لري.
د طالبانو د کابل ښاروالۍ نن سې شنبه، د مروغومي پر ۹مه نېټه وویل، چې دا هوايي پل به د پنځو استحکامي پایو ( مټو) په وسیله ودرول شي.
همدا راز د دې پله دایروي رمپ د ۳۳ متره شعاع په درلودلو سره، ۱۵۵ متره اوږدوالی لري چې د نړیوالو معیارونو په نظر کې نیولو سره ډیزاین شوی دی او چارې به یې د ۱۵ میاشتو په موده کې د کابل ښاروالۍ د کار ساتنې او مراقبت ریاست له لوري په اساسي توګه بشپړې شي.
کابل ښاروالي وايي، دا پُل په څلور لینونو کې چې، دوه یې د تګ او دوه نور یې د راتګ دي، طرحه شوی دی چې لوپ ته ورته رمپونه لري او د شهرنو سړک به له سالنګ واټ او جوی شیر سړک سره ونښلوي.
د طالبانو د کابل ښارولۍ د اعلامیې په پای کې ویلي، چې د دې هوايي پله په جوړېدو سره به د ښار په مرکزي برخو کې ترافیکي ګڼه ګوڼه کمښت ومومي او پر ښاري ښکلا سربېره به د کابل ښار تلپاتې پراختیا او اقتصادي ودې ته زمینه برابره شي.
د طالبانو د ریاستالوزرا اقتصادي مرستیال ملا عبدالغني برادر، نن سې شنبه د ایران د ریل پټلۍ ادارې له رییس جبار علي ذاکري سره لیدلي او د ریل پټلۍ د پراختیا پر لارو چارو یې خبرې ورسره کړې دي. ذاکري ویلي، هېواد یې غواړي د افغانستان له لارې چین له اروپا سره د ریل پټلۍ له لارې ونښلوي.
د طالبانو د ریاست الوزرا یاد معاونیت ویلي، چې په دې لیدنه کې دواړو لوریو د افغانستان او ایران ترمنځ د اقتصادي اړیکو، سوداګرۍ او په ځانګړې توګه د ریل پټلۍ د پراختیا په برخه کې د ګډو همکاریو پر پیاوړتیا بحث کړی.
د یاد معاونیت په وینا، د ایران د ریل پټلۍ ادارې رییس جبار علي ذاکري ویلي، هېواد یې غواړي د افغانستان له لارې د ریل پټلۍ شبکه پراخه کړي چې د افغانستان له ستراتیژیک موقعیت څخه په ګټې اخیستو، چین له اروپا سره ونښلوي.
هغه په دې برخه کې د یوې ګډې کمېټې د جوړېدو او له اړوندو شرکتونو سره د تخنیکي او عملي خبرو د پیل وړاندیز هم کړی دی.
بل خوا، ملا عبدالغني برادر ویلي چې د دې پروژې د اقتصادي ارزښت په اړه یې درې کاله وړاندې د ایران د ولسمشر له مرستیال سره خبرې کړې وې او د دې پروژې ارزښت یې ور ته تشریح کړی و.
نوموړي ټینګار کړی چې د ریل پټلۍ دا پروژه د سیمې د اقتصادي نښلونې لپاره مهمه ده او باید د یوې ګډې کمېټې په جوړېدو سره یې عملي چارې هر څومره ژر چې امکان ولري، پیل شي.
دا لیدنه په داسې حال کې کېږي چې د ایران او طالبانو ترمنځ اړیکې، سره له دې چې تهران لا هم دا ډله په رسمیت نده پېژندلې، د اقتصادي او ترانزیټي همکاریو له لارې د پراختیا په حال کې دي.
دواړه لوري هڅه کوي د ریل پټلۍ او سوداګرۍ په څېر ګډو پروژو له لارې خپلې اړیکې عملي او د جوړجاړي بڼې ته واړوي، خو د اوبو، امنیت او کډوالو پر سر اختلافونه لا هم د دواړو خواوو اړیکو پر فضا سیوری غوړولی دی.
د طالبانو د ریاستالوزرا اداري مرستیال مولوي عبدالسلام حنفي په یوه غونډه کې اعلان وکړ، چې په پام کې ده په راتلونکي کال کې د کابل ښار د ترانسپورتي ستونزو د حل لپاره د میټرو، ټراموې اوبي ار ټي سړکونو پروژې پلي شي.
مولوي عبدالسلام حنفي دا څرګندونې نن د کابل ولایت مقام د اداري ودانۍ مخې ته د هوایي پل جوړولو پروژې د پرانیستې په مراسمو کې وکړې.
نوموړي وویل، دا مهال د کابل ښاروالۍ له لوري ۲۵۸پراختیايي پروژې د پلي کېدو په حال کې دي.
د طالبانو ریاستالوزرا اداري مرستیال زیاته کړه، چې دوی هڅه کوي کابل ښار په یوه منظم، پرمختللي او عصري ښار بدل شي او د ښاریانو لپاره د ژوند اسانتیاوې برابرې شي.
حنفي همداراز وویل، د روان ۱۴۰۴لمریز کال لپاره د کابل ښار د پراختیا په موخه شاوخوا ۸ میلیارده او ۱۱۳ میلیونه افغانۍ بودجه ځانګړې شوې ده، چې د پلي کېدو په صورت کې به د کابل ښار بڼه بدله کړي.
نوموړي زیاته کړه، کابل ښاروالۍ په تېرو څلورو کلونو کې نږدې ۳۵۰ کیلومتره سړکونه جوړ کړي او ګټې اخیستنې ته یې سپارلي دي.
د یادونې ده چې د میټرو، ټراموې اوبي ار ټي پروژې د کابل ښار د ترافیکي ستونزو د کمولو او د عامه ترانسپورت د پیاوړتیا لپاره مهمې دي، خو طالبانو ددغو پروژو د څرنګتیا، پي کېدو لپاره د خپلې بودجې، پلان او پلی کېدو د وخت په تړاو څه نه دي ویلي.
د کابل د میټرو بس پروژې د لومړي پړاو کارونه د ۲۰۱۷ کال په جون کې پیل شول او پلان دا و چې په ټاکلي وخت بشپړ شي.
یو شمېر شنونکي په دې باور دي، چې طالبان خلکو ته غوړې ژمنې ور کوي، خو په عمل کې ډېری هغه نیمګړې پروژې پلې کوي، چې د تېر جمهوري حکومت له وخت ور پاتې دي.
د ملګرو ملتونو د بشري چارو د همغږۍ دفتر (اوچا) وایي، په ۲۰۲۶کال کې به نږدې ۲۲ مېلیونه افغانان چې د افغانستان نږدې نیمایي نفوس جوړوي؛ د خوړو، روغتیايي خدمتونو او نورو بنسټیزو اړتیاوو د پوره کولو لپاره بشري مرستو ته اړتیا ولري.
د اوچا د راپور له مخې؛ افغانستان د اوږدمهاله جګړو، کمزوري اقتصادي، د بنسټیزو خدمتونو د کمښټ او د خلکو د حقونو د پرلهپسې محدودېدو له امله له ژور بشري ناورین سره مخ دی.
دغه راپور چې د ۲۰۲۵کال د ډسمبر په پای کې خپور شوی ټینګار کوي، چې دغه اوږدمهاله ستونزې اوس د خوړو د ناامنۍ د زیاتېدو، د ګاونډیو هېوادونو څخه د کډوالو د پراخو ستنېدو، وچکالۍ، پرلهپسې طبیعي پېښو او له ټولنیز ژوند څخه د ښځو او نجونو د سیسټماټیکې اېستنې له کبله لا پسې پراخې شوې دي.
د راپور د ارزونې له مخې؛ په ۲۰۲۶کال کې به د افغانستان نږدې ۴۵سلنه نفوس بشري مرستو ته اړتیا ولري. اوچا وایي، که څه هم د اړتیا لرونکو کسانو په ټولیز شمېر کې یو څه کمی راغلی؛ خو بېلابېلو ناورینونو د خلکو د ژوند د بقا وړتیاوې کمزورې کړې ده.
اوچا څرګنده کړې، چې د ۲۰۲۶کال لپاره د ۱۷.۵ مېلیونه کسانو د ملاتړ پلان لپاره ۱.۷۱ مېلیارده امریکايي ډالرو ته اړتیا ده؛ څو د خوړو، روغتیا، سرپناه او نورو بنسټیزو بشري اړتیاوو په برخه کې د افغانستان تر ټولو زیانمنو وګړو سره مرسته وشي.
په فراه کې د طالبانو تر واک لاندې د پېښو پر وړاندې د مبارزې ادارې خبر ورکړی، چې د دغه ولایت په بکواه او خاکسفید ولسوالیو کې د سېلابونو له امله یو کس مړ او څلور نور ټپیان شوي دي.
یادې ادارې ویلي، ګڼ خلک د دغه سېلابونو له امله بندپاتې دي چې د ژغورنې لپاره یې هڅې روانې دي. یادې ادارې د اوښتو مالي زیانونو په اړه بیا څه نهدي ویلي.
دا په داسې حال کې ده، چې د طالبانو تر کنټرول لاندې د هواپوهنې ادارې نن سېشنبه (د مرغومي ۹مه) د افغانستان په ۲۴ ولایتونو کې د درنو واورو، بارانونو او سختو بادونو اټکل کړی و.
دغه اټکل د هرات، فراه، هلمند، کندهار، زابل، روزګان، دایکندي، غور، بادغیس، فاریاب، جوزجان، سرپل، بامیان، غزني، پکتیکا، پکتیا، میدان وردک، لوګر، کابل، پروان، بغلان، پنجشېر، کاپیسا او نورستان ولایتونو لپاره شوی دی.