په برېتانیا کې یو افغان د روغتون په انتظارخونه کې پر پنځو کسانو برید کړی
د برېتانیا د مرسيسایډ پولیس وایي چې یو ۲۰کلن افغان یې د « نیوټن ټولنیز روغتون» په انتظارخونه کې پر پنځو کسانو د برید په تور نیولی دی.
د برېتانیا د مرسيسایډ پولیس وایي چې یو ۲۰کلن افغان یې د « نیوټن ټولنیز روغتون» په انتظارخونه کې پر پنځو کسانو د برید په تور نیولی دی.
پولیس وایي، پېښه تېره ورځ له غرمې وروسته شاوخوا ۱۲ بجې د مرسيسایډ په نیوټن لي وېلوز ښار کې د نیوټن په ټولنیز روغتون کې شوې ده.
د راپورونو له مخې، یاد کس روغتون ته د لیدنې وخت غوښتنې لپاره ورغلی و، خو کله چې یې غوښتنه ونه منل شوه، نو په غوسه شو او پر خلکو یې برید وکړ.
د پولیسو په وینا، بریدګر د اوسپنې له یوې وسیلې، چې ګومان کېږي میخکوب «کراوبار» و، کار اخیستی او پر څو کسانو یې برید کړی دی.
د پولیسو مسوولې سارا روترهام ویلي: «موږ ته د یوه کس د توند او تاوتریخوالي ډک چلند راپور راورسېد. پولیس سملاسي سیمې ته ورسېدل او یاد کس په چټکۍ ونیول شو.»
د پېښې پر مهال د روغتون د بیړنیو خدماتو کارکوونکو له ټپیانو سره لومړنۍ طبي مرستې کړې دي. ویل کېږي چې د ټپیانو روغتیايي وضعیت د اندېښنې وړ نه دی.
د مرسيسایډ پولیسو ویلي، یاد افغان وګړی د قصدي ټپي کولو، عامه شخړې او د عامه شتمنۍ د زیانمنولو په ګډون په څو نورو تورونو نیول شوی او دا مهال د پولیسو سیمهییز تمځي کې تر پوښتنو ګروېږنو لاندې دی.
