د مزارشریف ښار د ۱۱مې امنیتي حوزې په مربوطاتو کې د تیلو د یو ټانک دننه اور لګیدنې سره هممهاله، د طالبانو دبلخ امنیه قوماندانۍ د اور وژنې مدیریت ویلي چې سږ کال په دغه ولایت کې د اورلګیدنې ۱۴۵ پیښې شوې دي. په دغو پېښو کې خلکو ته شاوخوا دیرش میلیونه افغانۍ زیان اوښتی.
یاد مدیریت د طالبانو اړوندو رسنیو ته ویلي، چې د اور وژنې ټیمونو د اورلګېدنو پروخت مخنیوی کړی او د دوه سوه میلیونو افغانيو په ارزښت یې خلکو ته د اوښتونکو زیانونو مخه نیولې ده.
د یادې قوماندانۍ د اور وژنې امر وایي، سره له دې چې پرمختللي او معیاري وسایط او تجهیزات په واک کې نه لري خو په ثبت شویو پیښو کې تقریبا دیرش میلیونه افغانۍ خلکو ته زیان اوښتی.
د طالبانو د بلخ محلي چارواکو ویلي، چې د مزارشریف ښار د ۱۱مې امنیتي حوزې په مربوطاتو کې د تیلو د ټانک نننۍ اورلګېدنه د اطفایې مدیریت له خوا مهار شوې او د زیات تخریب مخه نیول شوې ده.
