د امریکا د بهرنیو چارو وزارت په خپلو تازه څرګندونو کې د ایران د بالسټیک توغندیو او اټومي پروګرامونو پر وړاندې د نويو بندیزونو د لګولو ترڅنګ ویلي، تهران د بېپېلوټه الوتکو پراختیا ته دوام ورکوي او لا هم د ملګرو ملتونو د محدودیتونو په نقضولو سره د توغندیو اړوند توکي برابروي.
دغه وزارت په خپله اعلامیه کې ټینګار کړی، چې وروستي اقدامات د ایران د وسلو د پراخولو پر پروګرامونو د فشار د زیاتوالي لپاره ترسره شوي او دا ښيي، چې تهران لا هم خپلو تسلیحاتي فعالیتونو په ځانګړي ډول د بېپېلوټه الوتکو او بالسټیک توغندیو په برخه کې دوام ورکوي.
همداراز د ډونالد ټرمپ د یوه یادښت په حواله ویل شوي، چې د امریکا ولسمشر مخکې له مخکې په ښکاره اعلان کړی و، چې متحده ایالات به د ایران د بالسټیک توغندیو د پروګرام د مهار، د نورو نامتقارن او دودیزو وسلو د پراخېدو د مخنیوي، تهران ته د اټومي وسلو د ترلاسه کولو د فرصت د نهورکولو او سپاه پاسداران ته د هغو مالي سرچینو او شتمنیو د مخنیوي لپاره اقدام وکړي، چې د دې ډلې بېثباته کوونکي فعالیتونه تمویلوي.
په دې بیانیه کې ټینګار شوی، چې واشنګټن به د هر هغه فرد یا بنسټ پروړاندې د ځواب ویلو څخه هېڅ ډډه ونهکړي، چې د تهران د وسلو د پراخېدو له فعالیتونو سره مرسته کوي.
د امریکا د خزانې وزارت د سېشنبې په ورځ لس هغه بنسټونه او اشخاص چې په ایران او وېنزوېلا کې مېشت دي، تر بندیزونو لاندې راوستل. په دغو بندیزونو کې یو وېنزوېلایي شرکت هم دی، چې د ایران په طرحه جوړو شویو بېپیلوټه جنګي الوتکو په میلیونونه ډالري پلور کې یې ونډه لرله. همداراز، دغه بندیزونه هغه اشخاص او ادارې رانغاړي، چې د تجهیزاتي شبکو سره تړاو لري او د ایران د بېپیلوټه الوتکو او بالسټیک توغندیو له پروګرامونو یې ملاتړ کړی.
