د طالبانو د استخباراتو اړوند رسنۍ المرصاد ادعا کړې، چې پخوانی جنرال اکرام الدین سریع د ای ایس ای له خوا وژل شوی، ځکه نوموړي نه غوښتل تر لاس لاندې پخواني افغان نظامیان پاکستان ته لاړ شي. المرصاد وايي، په پاکستان کې جنرال جرئت او جنرال عبدالمتین حسین خېل پخواني نظامیان راټولوي.
المرصاد، چې د طالبانو د استخباراتو اړوند رسنۍ ګڼل کیږي، د چارشنبې په ورځ ولیکل، چې په ایران کې د ځینو سرچینو له قوله قوماندان اکرام الدین سریع د ایران د سپاه پاسداران د انصار له قرار ګاه سره د افغانستان د تیر جمهوریت د پېر نظامي افسرانو د چارو په برخه کې کار کاوه او د هغوی د ميل مطابق یې ګومارل، چې په دې وروستیو کې ورته یوه اداره ای ایس ای هم جوړه کړې ده.
المرصا ویلي، چې له ای ایس ای سره په دې برخه کې پخوانی جنرال عبدالمتین حسین خیل او جنرال جرئت همکاري کوي او غواړي د جمهوریت د وخت نظامي او امنیتي جنرالان او افسران پاکستان ته وبولي او له ( ای اس ای ) سره په همغږۍ یې دطالبانو او ټي ټي پي خلاف وکاروي.
جنرال حرئت او جنرال حسین خېل تر اوسه دې تور ته ځواب نه دی ویلی.
د المرصاد په وینا، قوماندان اکرام الدین سریع نه غوښتل په ایران او نورو هېوادونو کې میشت مخکیني جنرالان او افسران پاکستان ته لاړ شي، خو ای ایس ای د جنرال جرئت او جنرال عبدالمتین له لارې هڅه کړې وه، چې جنرال سریع له دې کاره لاس اخېستلو ته وهڅوي او یا یې ووژني.
د طالبانو دغه رسنۍ، چې ددې ډلې د استخباراتي سرچینو له قوله رپوټ او تحلیل خپروي، ویلي چې «د قوماندان اکرام الدین سریع د ترور تر شا د ای ایس ای لاس و او د دې لپاره چې د پړې ګوته افغانستان ته ونیول شي پاکستان له مخکې څخه ممکن يو لړ تېرایستونکي تدابیر نیولي وي».
المرصاد ویلي، چې په مشهد کې پر غلام معروف هم د جاوېد په نامه کس برید کړی و، چې ددوی په وینا، د هرات د کوهسان ولسوالۍ اوسېدونکی و.
د المرصاد په وینا، طالبانو د تهران او مشهد د قتلونو په اړه تحقیقات پیل کړي او په نږدې راتلونکې که به د تهران او مشهد د قتلونو په اړه د خپلو تحقیقاتو پایلې د مقتولینو له کورنیو او رسنیو سره شریکې کړي.
المرصاد وايي، چې د جنرال رازق کورنۍ د پاکستان غوښتنو ته منفي ځواب ویلی.
دا په داسې حال کې ده، چې د طالبانو مخالفو سیاستوالو او ډلو د جنرال سریع په وژنه کې د طالبانو استخبارات ښکیل ګڼلي دي.
