د سوېلي اسیا د ترهګرۍ معلوماتي راپور څرګندوي، چې په تېرو لسو کلونو کې ۲۰۲۵ کال د پاکستان لپاره تر ټولو خونړی کال و. د راپور لهمخې، تېر کال په دې هېواد کې نږدې څلور زره کسان د تاوتریخوالي پېښو او بریدونو کې وژل شوي دي.
د سوېلي اسیا د ترهګرۍ پر وړاندې د مبارزې پورټال د بلومبرګ خبري شبکې د راپور له قوله ویلي، چې په پاکستان کې د وسلهوالو د بریدونو له امله د ۲۰۲۵ کال د تلفاتو شمېر ۳،۹۶۷ تنو ته رسېدلی. دا شمېر د ۲۰۱۵ کال په ترڅ کې تر ټولو لوړ ښودل شوی دی.
دا راپور زیاتوي، چې د ډسمبر تر پایه پورې په ټول پاکستان کې لږ تر لږه ۱،۰۷۰ تاوتریخجنې پېښې ثبت شوې دي. په دغو پېښو کې ملکي وګړي، امنیتي ځواکونه او وسلهوال وژل شوي دي.
پاکستاني چارواکو او د امنیتي چارو شنونکو په ځلونو تحریک طالبان پاکستان (ټيټيپي) د تاوتریخوالي د زیاتوالي اصلي عامل بللی دی؛ هغه ډله چې د اسلاماباد په باور له افغان طالبانو سره اییولوژیک او پوځي اړیکې لري.
پر افغانستان د طالبانو له بیا واکمنېدو وروسته تحریک طالبان پاکستان (ټيټيپي) هم په پاکستان کې خپل بریدونه زیات کړي دي. دا ډله هڅه کوي، د پاکستان حکومت رانسکوره کړي او هلته خپل مطلوب سیاسي او مذهبي نظام حاکم کړي، لکه څنګه چې افغان طالبانو دا کار په افغانستان کې کړی دی.
بلومبرګ راپور ورکړی، چې د نړۍوال تروریزم د شاخص پر اساس پاکستان اوس د تروریزم له امله دویم تر ټولو زیانمن هېواد دی.
د امنیتي چارواکو په وینا، ټيټيپي پرمختللو وسلو لکه کواډکوپټر، امریکایي نښه ویشتونکو ټوپکونو او د شپې لید دوربینونو ته لاسرسی پیدا کړی دی، چې دغه وسلې له امریکايي ځواکونو څخه په افغانستان کې پاتې شوې دي.
په اسلاماباد کې امنیتي شنونکی افتخار فردوس وايي، چې د تحریک طالبان پاکستان مشرتابه اکثره له افغانستان څخه خپلې چارې پرمخ وړي او د دې ډلې جنګيالي کولی شي د افغانستان او پاکستان له پولې تېر شي.
د هغه په خبره، د دې ډلې شاوخوا ۸ زره او ۵۰۰ جنګيالي اوسمهال په افغانستان او پاکستان کې فعال دي.
