د اوکراین په سوېل خرسون کې د روسیې لهخوا ټاکل شوي والي ولادیمیر سالدو کییف تورن کړ، چې د ډرون په یوه برید کې یې لږ تر لږه ۲۴ کسان چې یو ماشوم هم پهکې شامل دی، وژلي دي. نوموړي وویل، دا کسان هغه مهال ووژل شول چې په یوه هوټل کې یې د نوي کال مراسم نمانځل.
سالدو د پنجشنبې په ورځ (د مرغومي ۱۱مه) په یوه بیان کې لیکلي، چې د اوکراین درېیو ډرونونو د نوي کال د نمانځغونډو ځای د خورلي په ساحلي کلي کې په نښه کړی دی.
نوموړي دا برید «قصدي» او د ملکي وګړو پر ضد وباله او ویې ویل، چې ګڼ شمېر کسان «ژوندي په اور کې وسوځېدل».
یوې روسپلوه سیمهییزې رسنۍ هم د یوه سخت زیانمن شوي ودانۍ انځورونه خپاره کړل او ویې ویل، چې همدا ودانۍ د یاد برید هدف وو.
د روسیې دولتي خبري اژانسونو راپور ورکړی، چې په دې برید کې لږ تر لږه ۲۹ نور کسان ټپیان شوي دي.
د روسیې د بهرنیو چارو وزارت ویاندې ماریا زاخارووا په ټېلګرام کې په یوه پیغام کې لیکلي، چې د دغه برید له امله پنځه ماشومان په روغتون کې بستر شوي دي.
هغې د اوکراین پر لوېدیځو ملاتړو نیوکه وکړه او هغوی یې د هغه څه وروستي مسوولین وبلل، چې د کییف «ترهګریز اقدامات» یې ونومول.
د روسیې د فدراسیون شورا رییس والنتینا ماتویینکو هم په خپل ټېلګرام چینل کې دغه برید غندلی دی.
خرسون د اوکراین له هغو څلورو سیمو څخه ده، چې روسیې په ۲۰۲۲ کال کې یې د خپلې خاورې برخه اعلان کړه؛ هغه اقدام چې کییف او د لوېدیځ ډېری هېوادونه یې ناقانونه بولي.
