د افغانستان د ۱۹ کلنو د کرېکټ ملي لوبډلې د زېمبابوې د درېاړخیزو نړۍوالو سیالیو په لړ کې د کوربه هېواد پر وړاندې لوبه وکړه او د ۱۹ منډو په توپیر یې ماته وخوړه. افغانستان چې په دې لوبه کې پچه ګټلې وه او د بریا جدي اړتیا یې لرله، ونهتوانېد چې د دې سیالۍ ۲ امتیازونه ترلاسه کړي.
د افغانستان لوبډلې د سیالۍ په پیل کې توپاچونه وکړه. د زېمبابوې لوبډلې په ۴۷.۳ اوورونو کې خپل ټول لوبغاړي له لاسه ورکړل او ۱۸۵ منډې یې جوړې کړې؛ داسې هدف چې په پنځوس اووره سیالیو کې د ترلاسه کېدو وړ ښکاره کېده، خو د افغانستان لوبډله یې په ترلاسه کولو کې پاتې راغله.
په دې سیالۍ کې د افغانستان له لوبډلې څخه سلیم خان د څلورو ویکټو په اخیستو ځلانده لوبه وکړه او همداراز حفیظ ځدراڼ درې ویکټې ترلاسه کړې.
په دویم پړاو کې بیا د افغانستان لوبډلې د توپاچونې پر وخت په ۴۰.۵ اوورونو کې خپلې ټولې ویکټې له لاسه ورکړې او یوازې ۱۶۶ منډې یې جوړې کړې. له محبوبخان پرته چې د افغانستان د لوبډلې کپټان دی او ۴۹ منډې یې ترلاسه کړې، نور لوبغاړي ونهتوانېدل چې د ویکټو د ترلاسه کولو لپاره لازم مقاومت وښيي.
دا د افغانستان د دغو سیالیو په لړ کې درېیمه لوبه او دویمه ماته وه. له دې ماتو سره افغانستان لا هم د یوه امتیاز په درلودو په جدول کې تر ټولو ښکته ځای کې پاتې شو او د دې سیالیو د اتلولۍ جام د ترلاسه کولو لپاره یې فرصت له لاسه ورکړ.
په جدول کې، د زېمبابوې لوبډله له څلورو امتیازونو سره په سر کې ده او د پاکستان لوبډله د دوو لوبو او درېیو امتیازونو په درلودو سره په دویم ځای کې ځای لري.
دا په داسې حال کې ده، چې د ۱۹ کلنو درېاړخیزو کرېکټ سیالیو کې د افغانستان، زیمبابوې او پاکستان لوبډلې برخه اخلي او د افغانستان د ۱۹ کلنو لوبډله د نړۍوالو سیالیو لپاره د چمتووالي په پلانونو کې د تمرین او تجربې د ترلاسه کولو په موخه په دې سیالیو کې ګډون کړی دی.
