د امریکا عدلیې وزارت اعلان کړی، چې د کریسټین ستورډیونټ په نوم یو ۱۸ کلن ځوان په شمالي کارولینا کې له داعــ.ش څخه په الهام د «ترهګریز» برید د ترسره کولو په هڅه تورن شوی دی. تورن کس مخکې خبرداری ورکړی و، چې امریکا به د داعــ.ش پر اهدافو د بریدونو بیه پرې کړي.
ستورډیونټ چې امریکايي تبعه دی او تېره میاشت ۱۸ کلن شوی، غوښتل د چاقو او چکش په وسیله د شمالي کارولینا پر یوه پلورنځي برید وکړي.
د ستورډیونټ په اړه څېړنې په ۲۰۲۲ کال کې پیل شوي، هغه مهال چې نوموړی لا قانوني عمر ته نهو رسېدلی.
د امریکايي چارواکو په وینا، هغه په انټرنېټ کې د داعش اړوند مطالب لوستي او د دې ډلې وېبپاڼو ته داخل شوی او وروسته یې له داسې کس سره اړیکه نیولې وه، چې ګومان یې کاوه د داعش غړی دی، خو په حقیقت کې هغه د نیویارک د پولیسو یو پټ مامور و.
په شمالي کارولینا کې د امریکا د څارنوال راس فرګوسن په وینا، ستورډیونټ له یاد استخباراتي کس سره په خبرو کې له داعش سره د وفادارۍ ژمنه کړې وه او د جهاد په تړاو یې خپل پلانونه څرګند کړي و.
د افبيای چارواکي وایي، دوی د هغه د کور د پلټنې پر مهال د «د نوي کال د ماښام برید» په نوم یو په لاس لیکل شوی سند موندلی، چې پکې ویل شوي و، هدف یې «د امکان تر حده د چاقو په وسیله د ملکي وګړو په نښه کول او د قربانیانو شمیر ۲۰ یا ۲۱» اټکل شوی و.
د هغه له ځایه یو بل لاسلیک شوی یادښت هم ترلاسه شوی، چې پهکې د «جهاد» غوښتنه لیکل شوې وه. د محکمې د اسنادو لهمخې، ستورډیونټ په خپلو یادښتونو کې د «امریکا او لوېدیځ د بشپړې ویجاړۍ» غوښتونکی و.
د امریکا فدرالي تحقیقاتي اداره ادعا کوي، هغه په هماغه وخت کې له داسې کس سره په تماس کې و، چې ګومان کېده د داعش غړی دی او دغه کس هغه هڅولی و، چې پر خپل ګاونډي د «چکش او چاقو» په وسیله برید وکړي.
د محکمې د اسنادو لهمخې، هغه مهال چې نوموړي «په بشپړه توګه تورې جامې اغوستې وې» او له کور څخه د وتلو په درشل کې و، د هغه نیکه یې مخه ونیوله او مهار یې کړ.
د محکمې د اسنادو لهمخې، هغه د ډسمبر په ۱۵مه په یوه پیغام کې لیکلي و: «زه د مرګ لپاره چمتو یم». او ویلي یې و چې «مسیحي مشرکان او د الجيبيټيکيو کسان» به هدف ګرځوي.
