د بې پولې ډاکټرانو سازمان وایي، د ژمي له سړې هوا سره هممهاله له پاکستان څخه د افغان کډوالو جبري ایستلو په افغانستان کې بشري بحران لا پسې ژور کړی او د ښځو او ماشومانو ژوند یې له جدي ګواښونو سره مخ کړی دی.
دغه سازمان د جمعې په ورځ، د مرغومي په ۱۲مه، په یوه راپور کې ویلي، چې د افغان کډوالو ایستل په یوه «ناورین راوړونکي بشري بحران» اوښتي او د افغانستان د خلکو کړاوونه یې څو برابره زیات کړي دي.
په راپور کې راغلي: «د نیول کېدو وېره د دې لامل شوې، چې ډېر کډوال روغتیایي مرکزونو ته مراجعه ونه کړي. دا وېره د رواني ټکان له امله د سقط جنین، د نه درمل شوو ناروغیو او د اسنادو د نشتون له کبله د روغتیایي خدمتونو له ترلاسه کولو د ډډې سبب شوې ده.»
بېپولې ډاکټرانو زیاته کړې، چې د ژمي له پیل سره هممهاله د کډوالو ایستل د هغوی وضعیت لا خراب کړی او ټینګار یې کړی، چې ژمی د بېسرپناه افغان کډوالو لپاره «مرګونی» دی.
د ملګرو ملتونو د کډوالو عالي کمېشنرۍ تازه ویلي، چې د ۲۰۲۵کال له جنورۍ تر نومبر پورې شاوخوا ۱.۸میلیونه افغانان له ایران او نږدې ۹۰۰زره نور له پاکستان څخه افغانستان ته ستانه شوي دي.
په راپور کې د بلوچستان په یوه مرکز کې د پنځه میاشتني افغان ماشوم یادونه هم شوې، چې د یوې شپې لپاره یې د سختې یخنۍ او د لومړنیو اسانتیاوو د نشتون له امله وضعیت بحراني شو، روغتون ته ولېږدول شو او وروسته یې ساه ورکړه.
د دې سازمان مشر، شو وېبینګ ویلي: «ژوندونه له جدي ګواښ سره مخ دي. افغان کورنۍ اړې شوې چې د ایستلو له وېرې ډک ژوند او یا د بېرته ستنېدو له خطرونو څخه یو غوره کړي. پاکستان باید ډاډ ورکړي، چې هېڅوک په زور بېرته نه ستنول کېږي.»
په ورته وخت کې، د ملګرو ملتونو د بشري مرستو د همغږۍ دفتر (اوچا) خبرداری ورکړی، چې افغانستان به په ۲۰۲۶کال کې هم د نړۍ له سترو بشري بحرانونو څخه یو پاتې شي. د اوچا د معلوماتو له مخې، په ۲۰۲۶کال کې به شاوخوا ۲۲میلیونه کسان، چې د افغانستان د نفوس ۴۵سلنه جوړوي، بشري مرستو ته اړتیا ولري.
