د ایران د پارلمان رییس محمد باقر قالیباف په دغه هېواد کې د روانو لاریونونو په اړه د ټرمپ څرګندونو ته په غبرګون امریکا ته خبرداری ورکړی، چې د هر ډول احتمالي بې پروا اقدام په صورت کې به ټول امریکايي مرکزونه او ځواکونه هدف وګرځول شي.
محمد باقر قالیباف په ایران کې د روانو لاریونونو په اړه د امریکا د ولسمشر ډونالډ ټرمپ د وروستیو څرګندونو په تړاو امریکا ته په اشاره په خپله اېکس پاڼه لیکلي:« د شیطان چېغې پورته شوې، ځکه چې د جاسوسي خدماتو د وسلهوالو جاسوسانو هغه هڅه چې د خلکو مشروع لاریونونه په تاوتریخوالي او وسلهوالې جګړې بدل کړي له ناکامۍ سره مخ شول».
نوموړي د جمعې په ورځ (د مرغومي ۱۲مه) په خپله اېکس پاڼه ویلي، چې د ایران ولس د تاریخ په اوږدو کې خپل دښمنان همداسې مایوسه کړي او ایران هېڅکله د اعتراض کوونکو صف له بهرنیو «مزدورانو» سره برابر نهګڼي.
نوموړي د ډونالډ ټرمپ څرکندونو ته په اشارې امریکا ته خبرداری ورکړی، چې د هر ډول احتمالي بې پروا اقدام په صورت کې به په سیمه کې ټول امریکايي مرکزونه او ځواکونه هدف وګرځوي.
دا په داسې حال کې ده، چې د امریکا ولسمشر نن د جمعې په ورځ ویلي، که د ایران حکومت پر سولهییزو لاریونوالو ډزې وکړي او هغوی په تاوتریخوالي سره ووژني، نو امریکا به د دغو خلکو د ژغورلو لپاره لاس په کار شي.
