د طالبانو والي: حکومت په زور نه کېږي
د طالبانو د بامیان والي عبدالله سرحدي د دغه ولایت له دیني عالمانو او مشرانو سره په یوه غونډه کې وویل چې حکومت باید د خلکو لپاره وي او د خلکو خدمت وکړي. هغه ټینګار وکړ چې "حکومت په زور نه کېږي."
د طالبانو د بامیان والي عبدالله سرحدي د دغه ولایت له دیني عالمانو او مشرانو سره په یوه غونډه کې وویل چې حکومت باید د خلکو لپاره وي او د خلکو خدمت وکړي. هغه ټینګار وکړ چې "حکومت په زور نه کېږي."
د طالبانو د بامیان ولایت والي عبدالله سرحدي تیره ورځ د مرغومي پر ۱۵مه په یوه ناسته کې د هر ډول قومي، مذهبي او ژبني تعصب په له منځه وړلو هم ټینګار وکړ.
عبدالله سرحدي په دې وروستیو کې د طالبانو د مشر ملا هیبت الله په امر د جوزجان د والي په توګه ټاکل شوی دی.
د طالبانو دغه چارواکی د "زور له لارې حکومت" ردولو ته په داسې حال کې اشاره کوي، چې د طالبانو ادارې واک ته له بیا رسېدا راهیسې په ځانګړې توګه د ښځو او لږکیو پر وړاندې د زور او جبر پر بنسټ پالیسۍ پلې کړې دي.
د طالبانو ویاند د پاکستان د پوڅ د ویاند وروستۍ څرګندونې غیرمسوولانه او پاروونکې وبللې. مجاهد د پاکستان له اړوندو ادارو غوښتي چې د رسمي دریځونو له چوکاټه د وتلو او د افغانستان په اړه د بېمنطقه تبلیغاتو پر ځای د خپلو داخلي مسایلو پر حل ترکیز وکړي.
د طالبانو ویاند ذبیحالله مجاهد د سې شنبې په ورځ، د مرغومي پر ۱۵مه د پاکستان د پوځ د ویاند وروستیو څرګندونو ته غبرګون ښودلی او وايي، هغه تبصرې چې د یو خبري کنفرانس پر مهال د افغانستان د حکومتي او ټولنیز جوړښت په اړه شوې، له واقعیت سره هېڅ تړاو نه لري او د یو مسوول پوځي دریځ له معیارونو سره په ټکر کې دي.
ذبیحالله مجاهد پر اېکس په یوه لړۍ پیغامونو کې ویلي، چې «اسلامي امارت دا ډول غیرمسوولانه او پاروونکې څرګندونې په کلکو ټکو غندي او د پاکستان له اړوندو ادارو غواړي چې د رسمي دریځ له چوکاټه د وتلو او د افغانستان په اړه د بېمنطقه تبلیغاتو پر ځای پر خپلو کورنیو ستونزو تمرکز وکړي».
د طالبانو ویاند ټینګار کړی چې افغانستان یو خپلواک او باثباته هېواد دی، قوي امنیتي جوړښت او مقتدره رهبرۍ لري او د هېواد پر ټوله خاوره بشپړ حاکمیت لري.
نوموړي زیاته کړې چې د افغانستان په کورنیو چارو کې لاسوهنه او د ګواښ ژبه د افغان ولس لپاره د منلو وړ نه ده.
ذبیحالله مجاهد همداراز د پاکستان پر اړوندو ادارو غږ کړی چې « د دواړو هېوادونو ترمنځ د اړیکو د حساسیت په نظر کې نیولو سره مسوولانه دریځ غوره کړي او له سنجیده څرګندونو کار واخلي».
د پاکستان پوځ ویاند ویلي، چې په افغانستان کې نه ټولګډونه حکومت شته او نه هم ترهګري ختمه شوې، بلکې «دا هېواد د ترهګرو او غیر دولتي وسلهوالو» پر مرکز بدل شوی.
احمد چودري شریف ویلي، چې شاوخوا ۲۵۰۰ بهرني وسله وال له سوریې نه افغانستان ته رسېدلي دي.
هغه وویل، په افغانستان کې نه حکومت شته، نه ترهګري له منځه تللې، بلکې برعکس، دده په وینا، «دا هېواد د ترهګرو او غیر دولتي وسلهوالو» پر مرکز بدل شوی دی.
نوموړي وویل، افغان طالبان چې اوس د «مور سازمان» په توګه عمل کوي، تحریک طالبان پاکستان یې د خپل تشکیلاتي جوړښت له مخې بیا منظم کړی، روزنه، لارښوونه او تنظیم یې ورکړی دی.
د شریف چودري په وینا، افغان طالبانو یوه ناسمه بیانیه هم جوړه کړې، چې ګواکې دوی امریکا او نړیوال ایتلاف له افغانستان نه په زور ایستلي او له همدې له لارې د ځوانانو او مذهبي احساساتو د پارولو هڅه کوي او خپل صفونه پراخوي. هغه وویل چې د امریکا د وتلو لاملونه نور څه وو، خو په دې اړه یې جزئیات ورنه کړل.
د یونیسف کلني راپور له مخې، په ۲۰۲۵ کال کې په افغانستان کې د پوهنې سیستم له سختو او بېمخینې ننګونو سره مخ و. د دغه راپور له مخې، په ۲۰۲۵ کال کې نږدې ۴میلیونه ماشومان له ښوونځيوبې برخې وو او شاوخوا ۲،۲ میلیونه نجونې له تعلیمي نظامه په بشپړ ډول اېستل شوې دي.
د یونیسف د تازه راپور موندنې ښيي چې که څه هم په تېرو دوو لسیزو کې د زدهکړو لاسرسی پراخ شوی و، خو له ۲۰۲۱ کال وروسته سیاسي بدلونونو، محدودوونکو پالیسیو، دوامدارو بشري بحرانونو او کمې مالي پانګونې د دې پرمختګ ډېره برخه بېرته له منځه وړې ده.
د رپوټ پر بنست، پایله دا ده چې میلیونونه ماشومان، په ځانګړي ډول نجونې له زدهکړو بېبرخې پاتې دي او د زدهکړې کیفیت په جدي ډول ټیټ شوی دی.
د دغه راپور له مخې، په ۲۰۲۵ کال کې نږدې ۴میلیونه ماشومان له ښوونځيوبې برخې و. د یونیسف د معلوماتو له مخې، نجونې تر ټولو ډېرې اغېزمنې شوې دي؛ له شپږم ټولګي پورته د نجونو پر زدهکړو بندیز د دې لامل شوی چې شاوخوا ۲،۲ میلیونه نجونې له تعلیمي نظامه په بشپړ ډول ووځي. دې وضعیت نه یوازې د هغوی د زدهکړې حق تر پښو لاندې کړی، بلکې د ټولنې پر راتلونکي، اقتصاد او ټولنیز ثبات یې هم ژور منفي اغېز کړی.
راپور ښيي چې د افغانستان ماشومان له یو ستر تعلیمي بحران سره مخ دي. له ۹۰سلنې ډېر لس کلن ماشومان نه شي کولی یو ساده متن ولولي او درک یې کړي. دا شمېره افغانستان د نړۍ له هغو هېوادونوله جملې شمېري چې له “ښوونځي پرته د زدهکړې” تر ټولو لوړه کچه لري. د مسلکي ښوونکو کمښت، په ځانګړي ډول د ښځینه ښوونکو نشتوالی، ضعیف تدریسي مواد او د ارزونې محدود نظامونه د زدهکړې د کمزورو پایلو اصلي لاملونه بلل شوي دي.
د راپور په اساس، د هېواد په کچه نږدې نیمایي ښوونځي معیاري ودانۍ نه لري. ډېری ښوونځي له برېښنا، پاکو اوبو، تشنابونو او خوندي انګړه بېبرخې دي. دا ستونزې په ځانګړي ډول د نجونو پر حاضرۍ ناوړه اغېز کوي، ځکه د خوندي چاپېریال نشتوالی د کورنیو اندېښنې زیاتوي.
یونیسف وایي چې د خوندي او معیاري ښوونیزو فضاوو له پراخېدو پرته، د زدهکړې دوام ناشونی دی.
د راپور له مخې، د ماشومتوب لومړنۍ زدهکړې لا هم په افغانستان کې خورا محدودې دي؛ له ۳ تر ۵ کلنۍ کم تر یو سلنه ماشومان په دې پروګرامونو کې شامل دي. همداراز، یوازې شاوخوا ۲۷سلنه افغان ښځې د لوستلو سواد لري چې دا د نړۍ له تر ټولو ټیټو کچو څخه ده. یونیسف ټینګار کوي چې د ماشومتوب زدهکړې او د ښځو په لیک لوست پانګونه د اوږدمهاله بدلون لپاره حیاتي ارزښت لري.
راپور زیاتوي د طبیعي افتونو، فقر، او له ایران او پاکستان څخه د کډوالو د پراخې راستنېدنې له امله، د پوهنې سیستم نور هم تر فشار لاندې راغلی دی. اټکل کېږي چې په نوي کال کې به شاوخوا ۸،۹ میلیونه ماشومان بېړنیو تعلیمي مرستو ته اړتیا ولري. راستنېدونکي ماشومان، په ځانګړي ډول نجونې له ۱۲ کلنۍ پورته، د ښوونځیو د کمښت او موجودو محدودیتونو له امله له جدي خنډونو سره مخ دي.
سره له دې ټولو ننګونو، راپور کې ټینګار شوی چې لا هم د بدلون فرصتونه شته. د بنسټیزو زدهکړو ساتنه، د ښوونکو روزنه او ملاتړ، د خوندي او ټولشموله ښوونځیو پراختیا او د مهارتونو زدهکړه چې د کار بازار اړتیاوو سره برابره وي، کولی شي د بشري اړتیاوو او راتلونکي بیا رغونې ترمنځ پُل جوړ کړي.
د راپور وروستۍ برخه کې راغلي چې یونیسف له خپلو ملي او نړیوالو شریکانو سره یو ځای په دې هڅه کې دی چې په افغانستان کې د هر ماشوم د زدهکړې حق خوندي کړي. دغه اداره ټینګار کوي چې پرته له همغږو، دوامداره او کافي پانګونو، د افغانستان د پوهنې کړکېچ به لا پسې ژور شي.
په دوحه کې د طالبانو سفارت وايي، چې سهیل شاهین د قطر د کار وزارت اړوند الجسور شرکت له رییس عبد الهادي بخیت برقان سره په لیدنه کې د طالبانو د کار او ټولنیزو چارو وزارت او د الجسور شرکت تر منځ د کارګرانو د شوي هوکړه لیک د تعقیب په اړه خبرې کړې دي.
په دوحه کې د طالبانو سفارت نن سې شنبه، د مرغومي پر ۱۶مه وویل، چې په دې لیدنه کې د افغان کارگرو د ګومارنې په تړاو د شوي هوکړه لیک د تعقیب او قطر هېواد ته د افغان کارگرو او د وړ کسانو د استولو د پروسې په اړه بحث شوی دی.
په دې ناسته کې د شویو خبرو او د افغان کارګرو په تړاو د شوي تړون د عملي کېدو په اړه طالبانو نور ډېر جزییات نه دي ورکړي.
د طالبانو د کار او ټولنیزو چارو وزارت ویاند سمیع الله ابراهیمي د روان کال د زمري پر ۲۰مه ویلي و، چې له ګاونډیو هېوادونو او په ځانګړي توګه له ایران او پاکستان نه نوي راغلي هېوادوال چې په شرایطو برابر وي، کولی شي دې پروسه کې شامل او د نوم لیکنې پرمهال ټول تحصیلي، مسلکي اوتجربوي اسناد هم له ځانه سره ولري.
د طالبانو د کار او ټولنیزو چارو وزارت تر دې مخکې هم له قطر سره یوه هوکړه کړې وه، چې له مخې به یې دوه زره افغان کارګر دغه هېواد ته واستول شي.
په افغانستان کې د طالبانو له بیا واکمنېدو راهیسې سلګونه زره کسان له خپلو دندو او روزګار بېبرخې شوي او ورسره هم مهاله په ایران او پاکستان کې پر کار بوخت سلګونه زره افغانان بېرته افغانستان ته شړل شوي او په کور دننه هم ورته کاري فرصتونه نشته.
ځینې افغانان پر طالبانو نیوکې کوي، چې هر څه یې تر خپلې ډلې محدود کړي او حتا په حکومتي چوکاټ کې هم د عادي کچې کارګرو ته چې له دغې ډلې سره اړیکې ونه لري، دندې نه ورکوي.
د اریانا افغان هوايي شرکت وايي، چې د تخنیکي او عملیاتي بهیر د پیاوړتیا په موخه د الوتکو دوه انجنونه د سېشنبې په ورځ د یوې چارټر کارګو الوتکې له لارې له ترکیې څخه کابل ته ولېږدول شول. دغه انجنونه د ۴،۷ میلیونه ډالرو په ارزښت له سربیا او ترکیې پېرل شوي دي.
یاد شرکت وايي، دغه انجنونه چې د نړیوالو تخنیکي معیارونو له مخې په بشپړه توګه ارزول شوي، د شاوخوا ۴،۷ میلیونه امریکايي ډالرو په ارزښت له ترکیې او سربیا څخه پېرل شوي دي.
ټاکل شوې ده چې دغه انجنونه په نږدې راتلونکې کې د اریانا د تخنیکي ټیم لهخوا په بوینګ ۷۳۷ او ایرباس ۳۱۰ الوتکو کې نصب او فعال شي.
د اریانا افغان هوايي شرکت رییس ملا بختالرحمن شرافت ویلي، د الوتکو د تجهیزاتو پر وخت برابرول د مسافرو د خوندیتوب، د الوتنو د مهالوېش د تنظیم او د باور وړ خدماتو د وړاندې کولو لپاره مهم ګام دی.
د طالب چارواکو په وینا، د دغو انجنونو له فعالېدو سره به د اریانا د الوتنو ظرفیت لوړ شي، تخنیکي ستونزې او خنډونه به کم شي او د کورنیو او نړیوالو الوتنو پروګرام به لا پیاوړی او منظم شي.
د هرات زعفرانو د «نړیوال خوند» سیالۍ په وروستي پړاو کې په پرله پسې ډول د لسم کال لپاره د نړۍ د لوړ کیفیته زعفرانو په ډله کې لومړی مقام ګټلی دی. دغه سیالي د بلجیم په بروکسل کې د نړیوال خوند انسټیټیوټ ترسره کیږي.
د نړیوال خوند انسټیټیوټ له ۲۰۰۵ کال راهیسې د خوړو او مشروباتو د خوند کیفیت په مسلکي توګه ارزوي او په همدې موخه یې له مختلفو هیوادونو څخه له ۲۵۰ د زیاتو مسلکي پخلیوالو او خوند څکونکو یوه ډله ګومارلې ده.
د هرات د زعفرانو شرکت یوه چارواکي افغانستان انټرنشنل ته وویل، چې سږکال اصلي سیالي د افغانستان، ایران، هسپانیا او یونان ترمنځ وه چې په نړۍ کې د زعفرانو ترټولو لوی تولیدوونکي دي.
ایران د زعفرانو په تولید کې د افغانستان ترټولو جدي سیال دی.
د هرات زعفران د لوړ کیفیت ځانګړنو له امله د انسټیټیوټ په نړیوالو سیالیو کې ۹ ځله د رنګ ځواک، قوي بوی او مطلوب خوند په برخو کې لومړی مقام ګټلی دی.
په دې وروستیو کې، یوه نوې څیړنه چې په ساینسي ژورنال "د باغدارۍ علومو کې پرمختګونه" کې خپره شوې، په هرات کې د تولید شويو زعفرانو کیفیت د ایران له تولید سره پرتله کوي او راپور ورکوي چې معاینه شوې بېلګې یې په څو شاخصونو کې له نړیوالو معیارونو ډیرې دي او له همدې امله یې د هرات زعفران د لومړۍ درجې کیفیت کټګورۍ کې ځای پر ځای کړي دي.
د هرات اوسیدونکي د ۱۳۸۰ مې لسیزې له لومړیو راهیسې زعفران کري.
دا کښت په هغو کلونو کې پیل شو چې کورنیو او نړیوالو ادارو بزګرانو ته د کوکنارو د کښت د بدیل په توګه زعفران وړاندې کړل.
د هرات اقلیمي شرایط او مناسبه خاوره د دې لامل شوې چې د زعفرانو کښت د ولایت په مختلفو ولسوالیو کې په چټکۍ سره دود شي.