په هرات کې د طالبانو د والي ویاند محمدیوسف سعیدي ویلي، چې په تېر ۲۰۲۵کال کې د دغه ولایت په صنعتي ښارګوټي کې شاوخوا ۳۵۰ کوچنیو او لویو فابریکو په عملي ډول خپل تولیدي او صنعتي فعالیتونه پیل کړي دي.
نوموړي پر اېکس پاڼه کاږلي:« د صنعتکارانو هر اړخیز ملاتړ، پانګهوالو ته لازمې اسانتیاوې، د تعرفو کمښت، خامو موادو ته اسانه لاسرسی، سوداګرو او صنعتکارانو ته د جوازونو د صادرولو بهیر اسانه کول او اړوندو چارو ته د رسېدنې پروسې ساده کول هغه مهم عوامل دي، چې د هرات د صنعتي فعالیتونو د پانګونې د جذب لامل شوي دي.»
هغه زیاته کړې، د فابریکو د فعالیت پراختیا نه یوازې دا چې د کورنیو تولیداتو پیاوړتیا لامل شوې؛ بلکې سلګونه کسانو ته یې د کار زمینه هم برابره کړې ده. د هغه په وینا؛ د فابریکو د فعالیت پراختیا د افغانستان په اقتصادي ځانبسیاینه کې هم مهم رول لري.
طالبان داسې مهال د کاري زمینې برابرېدو خبره کوي، چې په افغانستان کې ځوانان د بېکارۍ له پراخې کچې سره مخ دي. د بېکارۍ د پراخې کچې له امله ګڼ ځوانان په ناقانونه او خطرناکه لارو نورو هېوادونو ته د تګ هڅه کوي، چې ډېری وخت د دوی د مړینې لامل هم کېږي.
