د طالبانو د امربالمعروف، نهې عن المنکر او شکایتونو اورېدو وزارت خبر ورکړی، په پکتیکا ولایت کې د دوی د محتسبانو لهخوا هغه دوه ښځې نیول شوې چې څو کاله یې د نارینهو جامو په اغوستلو سره د کوډو له لارې خلکو ته د «دیني باورونو او ټولنیزو اصولو» خلاف زیان رسولی و.
په پکتیکا کې د طالبانو امر بالمعروف رییس مولوی رحمت الله محق ویلي، دغه دوه ښځې د سیمې د خلکو له پراخو شکایتونو وروسته ونیول شوې. هغه وویل: «د دوی د نیولو لامل د خلکو د دیني باورونو ته زیان رسول، د خرافاتو خپرول او د خلکو فریب و. دوی هڅه کوله چې د کوډو له لارې د کورنیو ترمنځ اختلاف رامنځته کړي.»
هغه زیاته کړې، له نیول شویو کسانو څو ټوکه کتابونه او د کوډو اړوند وسایل هم کشف شوي دي. د خبرپاڼې له مخې؛ دغه دوه مېرمنې وروسته له لومړنیو څېړنو عدلي او قضایي ادارو ته سپارل شوې.
