په اندونیزیا کې د شمالي سولاوېسي په سیمو کې د سېلابونو له کبله لږترلږه ۱۴ کسان مړه شوي او څلور نور لا هم تري تم دي. چارواکي وايي، سېلابونو سلګونه کورونه ویجاړ کړي او ګڼ شمېر خلک یې بېځایه کړي هم دي.
د ژغورنې ادارې ویاند نوریادین ګومیلنګ رویټرز خبري اژانس ته ویلي، د سېلابونو له امله ۱۴ کسان مړه، ۱۸ ټپیان شوي او څلور نور تري تم دي. د اندونیزیا د ناورین د کمښت ادارې ویاند عبدالمهاري ویلي، چې تر دې دمه لږ تر لږه ۴۴۴ کسان ځایي ښوونځیو او کلیساوو ته انتقال شوي؛ څو خوندي شي.
د شمالي سولاوېسي والي یولیوس سیلوانوس هم ویلي، چې سېلابونو سلګونه کورونه او دولتي ودانۍ ویجاړې کړې دي.
