د اوکرایني چارواکو په وینا، روسیې د دوشنبې په ورځ (د مرغومي ۱۵مه) د اوکراین پر دویم لوی ښار خارکییف پنځه توغندیز بریدونه ترسره کړل او له امله یې د انرژۍ بنسټیزې زېربناوې زیانمنې شوې او همداراز یې په سوېل ختیځ ښار دنیپرو کې د امریکايي کرنیزو توکو تولیدوونکي شرکت «بونګه» په نښه کړ.
د اوکراین د بهرنیو چارو وزیر اندري سیبیها وايي، چې دنیپرو کې د امریکا اړوند پر یوه شرکت د روسیې برید د دې څرګندونه کوي، چې ولادیمیر پوتین د امریکا په مشرۍ له نږدې څلورو کلونو راهیسې د روانې جګړې د پای ته رسولو لپاره هڅو ته هېڅ درناوی نهلري.
د خارکییف ښاروال ایهور تېرېخوف بیا ویلي، چې پر ښار شوي بریدونه «یوازې پر تاسیساتو بریدونه نهدي، بلکې دا د تودوخې پر سیستم، پر اوبو او د خلکو پر عادي ژوند بریدونه دي. دوی هڅه کوي موږ د وېرې او تیارې له لارې مات کړي».
هغه په مشخص ډول په دې تړاو چې د روسیې په دغو بریدونو کې کوم تاسیسات په نښه شوي، څه نهدي ویلي.
ویل کېږي، پر خارکییف د روسیې په یادو بریدونو کې لږ تر لږه یو ملکي وګړی ټپي شوی دی، خو لا تر اوسه روسیې د دغو بریدونو په تړاو څه نهدي ویلي.
