د شمالي کوریا مشر کېم جونګ اون د اوکراین په جګړه کې د خپلو وژل شویو سرتېرو ستاینه کړې او هغوی یې اتلان یاد کړي دي. نوموړي دغه څرګندونې د یادو سرتېرو د یاد څلي د جوړېدو چارو څخه د لېدنې پرمهال کړې دي.
د KCNA دولتي خبري اژانس د راپور له مخې؛ کېم جونګ اون د دوشنبې په ورځ د یاد څلي د جوړولو چارې وکتلې، چې د هغو سرتېرو په یاد جوړېږي چې له دغه هېواده بهر په جګړو کې وژل شوي دي.
د راپورونو له مخې؛ شمالي کوریا د روسیې سره د متقابل دفاعي تړون له مخې په ۲۰۲۴کال کې شاوخوا ۱۴زره سرتېري د اوکراین جګړې ته واستول؛ څو د روسي ځواکونو ترڅنګ وجنګېږي. د سویلي کوریا، اوکراین او لوېدیځو سرچینو د معلوماتو له مخې؛ په دغه جګړو کې له ۶زرو ډېر د شمالي کوریا سرتېري وژل شوي دي.
د KCNA لهخوا په خپرو شویو انځورونو کې ښکاري، چې کېم جونګ اون او لور یې جو اې د یاد څلي په سیمه کې نیالګي هم کېنولي. په همدې حال کې په پلازمېنه پیونګیانګ کې د انځورونو یو نندارتون هم پرانیستل شوی، چې د کېم جونګ اون تر مشرۍ لاندې د شمالي کوریا پرمختګونه نندارې ته وړاندې کوي. دغه نندارتون داسې مهال پرانیستل شوی، چې دغه هېواد د ګوند د یوې مهمې غونډې د جوړېدو لپاره چمتووالی نیسي.
