د امریکا د جمهوريپال ګوند سناتور ریک سکاټ خبرداری ورکړی، که ایران د خپل اټومي او توغندیز پروګرام پراختیا ته دوام ورکړي؛ نو د امریکا ولسمشر ډونالډ ټرمپ به پر دغه هېواد سخت پوځي برید وکړي. دغه څرګندونې د تهران او واشنګټن ترمنځ د کړکېچ د بیا زیاتېدو نښه بلل کېږي.
هغه د ایران د اټومي او توغندیزو فعالیتونو په اړه د ډونالډ ټرمپ د وروستیو خبرداریو په تړاو ویلي، که تهران یو ځل بیا د اټومي تاسیساتو جوړولو او پراختیا ته مخه کړي؛ نو د امریکا له لوري د پوځي برید احتمال شته.
ښاغلي سکاټ ویلي: «که هغوی بیا مخکې ولاړ شي او د اټومي تاسیساتو جوړول پیل کړي؛ نو زما په اند ټرمپ به پرې سخت بمبار وکړي.» ډونالډ ټرمپ په دې وروستیو کې په جلا، جلا ویناوو کې د ایران د اټومي پروګرام د بیا پیل او همدارنګه د ایران د حکومت لهخوا د لاریونوالو د ځپلو او وژلو په تړاو خبرداری ورکړی دی.
