د محلي سرچینو په وینا، د چارشنبې په ورځ په هرات ولایت کې د دوو ټرافیکو پېښو په پایله کې لږ تر لږه ۵ کسان مړه شوي او ۱۶ نور ټپیان شوي دي. د ژغورنې نړیوالې کمېټې (IRC) ویلي، چې د هرات د اسلام کلا په ترافیکي پېښه کې یې یو تن کارکوونکی مړ شوی دی.
د پېښو ځای د هرات-اسلام کلا لویه لار ښودل شوې.
په هرات کې د طالبانو پولیسو په یوه خبرپاڼه کې ویلي چې په دوو جلا ترافیکي پېښو کې د یوې ښځې په ګډون پنځه کسان مړه شوي دي.
طالب چارواکو تایید کړې چې په یوه بله ټرافیکي پېښه کې ۱۶ کسان ټپیان شوي دي.
د طالبانو د مشر د حکم پر اساس، ددې ډلې په ادارو کې د نویو تبدیلیو په لړ کې د طالبانو د اوبو او انرژۍ وزیر د کلیو بیا رغونې وزیر او د برېښنا شرکت رییس د بهرنیو چارو وزارت د تشریفاتو رییس په توګه ټاکل شوي دي.
د طالبانو ویاند ذبیحالله مجاهد دا ټاکنې پر خپل ایکس خپرې کړې دي.
په نویو ټاکنو کې د طالبانو د اوبو او انرژۍ وزیر ملا عبداللطیف منصور د کلیو د بیا رغونې او پراختیا د وزیر په توګه او د کلیو د بیا رغونې او پراختیا وزیر ملا محمد یونس اخوندزاده د اوبو او انرژۍ د وزیر په توګه ټاکل شوي دي.
دغه راز د طالبانو د ټولګټو وزارت مالي او اداري معیین ملا عبدالحق همکار د افغانستان برېښنا شرکت د عمومي رییس او د اطلاعاتو او فرهنګ وزارت د ځوانانو پخوانی معیین قاري محمد یونس راشد د ټولګټو وزارت د مالي او اداري معین په توګه ګومارل شوي دي.
د ملا هبت الله اخوندزاده د حکم له مخې، د برېښنا شرکت عمومي رییس ډاکټر عبدالباري عمر د دې ډلې د بهرنیو چارو وزارت د تشریفاتو د رییس په توګه ټاکل شوی دی.
نوې ټاکنې یوازې تبدیلۍ دي او نوې څېرې پکې نه ترسترګو کیږي.
په ننګرهار کې د طالبانو رسنیز دفتر پنجشنبه د (مرغومي ۱۸مه) خبر ورکړی، چې د دغه ولایت په بهسودو ولسوالۍ کې د خانکي په نوم د راستنو شویو لپاره ښارګوتی پرانېستل شو. په دغه ولایت کې د طالبانو والي ملا نعیم اخوند په رسمي توګه د دغه ښارګوټي د ځمکو وېش هم پیل کړ.
په خبرپاڼه کې راغلي، چې یاد ښارګوټي کې به هرې کورنۍ ته د کور جوړولو لپاره پنځه پنځه بسوې ځمکه ورکړل شي او همدا راز به د سرپناوو جوړولو په برخه کې ورسره مرستندویه ادارې هم همکاري وکړي. خبرپاڼه زیاتوي، دغه ښارګوټی ټول ټال ۳زره جریبه ځمکه لري چې ۵زره کورنۍ به پهکې له استوګنې برخمنې شي.
په ننګرهار کې طالبان وایي، د خانکي ښارګوټي لپاره پراختیایي پلانونه هم شته چې پهکې د عمومي او فرعي سړکونو جوړېدنه، پارکونه، ښوونځي، جوماتونه، دارالعلوم، دیني مدرسه، کلینیک، د اوبو رسولو شبکې او مخابراتي سایټونه هم شامل دي.
د ملګرو ملتونو په ګډون یو شمېر نړۍوالو سازمانونو اندېښنه څرګنده کړې، چې افغانستان ته د بېرته ستنېدونکو لړۍ له بشري ناورین سره هممهاله پیل شوې او په کور دننه دغه ستنېدونکي د سرپناوو له جدي ستونزو سره هم مخ کېږي. راپورونه وایي، له پاکستان او ایران نه یو شمېر ستنې شوې کورنۍ د هېواد په بېلابېلو ولایتونو کې د ژمي به دې سوړ موسم کې له سرپناوو پرته خورا سخت ژوند تېروي.
د طالبانو تر واک لاندې برېښنا شرکت خبر ورکړی، چې د کابل شنو صنایعو پارک ۳۴مېګاواټه لمریزې تولیدي برېښنا دستګاه، ۱۲۶مېګاولټ امپیر سب سټېشن او ۲۲۰کیلو ولټه برېښنا د لېږد مزي جوړولو پروژو کار پیل شو.
د یادې پروژې ټولیز ارزښت ۲,۶۷ مېلیارده افغانۍ ښودل شوی، چې موخه یې د کابل ښار د برېښنا ستونزې کمول او د برېښنا رسولو سیستم پیاوړتیا ښودل شوې ده. د یاد شرکت اجرایوي مشر عبدالباري عمر د یادو پروژو په پرانیستې مراسمو کې ویلي، چې د دغه پروژو په بشپړېدو سره به د کابل د شنو صنایعو پارک د صنعت کارانو ستونزې حل شي.
هغه ویلي، د دغه پروژو له لارې به له ۵۰۰ څخه زیاتو کسانو ته د کار زمینه برابره شي او همدارنګه به سلګونه نورو کسانو ته په نامستقیم ډول کاري فرصتونه برابر شي.
د هغه په وینا؛ دغه پروژه به د کابل ولایت د برېښنا د تولید او لېږد په برخه کې مهم رول ولوبوي او د خلکو پر ورځني ژوند به مثبت اغېز ولري. د یادونې ده، چې څو ورځې وړاندې طالبانو د نغلو ۲۲.۷۵مطګاواټه لمریزې برېښنا د تولید دستګاه هم ګټې اخیستنې ته وسپارله.
ورته مهال د کابل ښار اوسېدونکي د بريښنا له پراخې پرچاوۍ سخت اندېښمن دي او وايي، چې په ځينو سیمو کې ان په ۲۴ساعتونو کې په پرلهپسې توګه څو ساعته د برېښنا له پرچاوۍ سره مخ دي.
د طالبانو سترې محکمې د یوې خبرپاڼې په خپرولو سره ویلي، چې په میدان وردګ ولایت کې یې د یوې مېرمنې په ګډون درې کسان په دُرو وهلي دي. د یادې محکمې په خبره؛ دغه کسان یې «د نامشروع اړیکو» په تور په دُرو وهلي دي.
د یادې محکمې په خبرپاڼه کې راغلي، چې په میدان وردګ ولایت کې د طالبانو ابتدایه محکمې له دې ډلې «يو مجرم ته د يو کال، دويم مجرم ته څلور میاشتې او درېيم مجرم ته د ۱۲ کلن تنفيذي بند او له ۳۰ تر ۳۹ دُرو سزا ورکړې ده».
د طالبانو سترې محکمې د خپرو شویو شمېرو لهمخې؛ دغه ډلې د خپلې واکمنۍ له پیل راهیسې ۱۸۴۸ کسانو ته په عام محضر کې سزاوې ورکړې دي. په دغه کسانو کې ۲۵۰ مېرمنې هم شاملې دي.
یادې ډلې په ۲۰۲۵کال کې بیا لږ تر لږه ۱۰۳۰ کسان د بېلابېلو تورونو په تور په عام محضر کې په دُرو وهلي دي. د افغانستان انټرنشنل - پښتو د څېړنو لهمخې؛ په ۲۰۲۵کال کې په افغانستان کې بدني سزاوې د تېر کال پرتله دوه برابره زیاتې شوې وې.
هندي رسنۍ وایي، ترکيې د طالبانو او پاکستان ترمنځ د ډېپلوماټيکو هڅو تر ناکامۍ او د بنسټيزو اختلافاتو د لا ژورېدو وروسته په رسمي ډول د اسلاماباد او کابل ترمنځ له خپل منځګړيتوب څخه لاس واخيست.
نیوز ۱۸ټلوېزیوني شبکې د لوړپوړو امنيتي او ډېپلوماټيکو سرچينو په حواله راپور کې لیکلي، انقرې هغه مهال دغه پرېکړه وکړه چې طالبانو د پاکستان بنسټیزې امنيتي غوښتنې ونه منلې. د دغو لوریو ترمنځ د ترکیې، قطر او سعودي عربستان په منځګړتوب څو پړاوه خبرې اترې وشوې؛ خو بې له کومې څرګندې پايلې پای ته ورسېدې.
پر کابل واکمنو طالبانو د اسلاماباد له لوري وړاندې شوي شرطونه «نامشروع» وبلل او په ټينګه يې رد کړل او ټينګار يې وکړ، چې دغه ډول غوښتنې د يوې پراخې سولې د هوکړې بنسټ نهشي کېدای. په همدې لړ کې ترکي چارواکو په رسمي ډول اسلاماباد ته خبر ورکړی، چې طالبان د پاکستان محوري امنيتي غوښتنو منلو ته لېوالتيا نهلري او همدا موضوع بالاخره د انقرې د منځګړيتوب د هڅو د درولو لامل شوه.
د اوسني بنبست اصلي محور د هغو غوښتنو ټولګه ده، چې پاکستان یې له افغان طالبانو څخه لري؛ په دغه غوښتنو کې د تحريک طالبان پاکستان (TTP) د سختدريځو غړو اسلاماباد ته سپارل، د ډيورنډ کرښې په اوږدو کې د پنځه کيلومتره حايل سيمې جوړول، د افغانستان پر ترانزيټي سوداګرۍ او د توکو پر لېږد رالېږد سخت کنټرول، پر کابل د اسلاماباد د امنيتي برلاسۍ په رسميت پېژندل او له پاکستان نه د افغان کډوالو بېړنۍ ستنېدنه شامله ده.
افغان طالبانو دغه ټولې غوښتنې په کلکه رد کړې او وايي، چې دغه ډول شرطونه د افغانستان ملي حاکميت او خپلواکۍ ته زيان رسوي. د ترکيې له لوري له منځګړيتوبه په شا کېدنه د دواړو ګاونډيو هېوادونو ترمنځ د کړکېچ د ژورتيا او پېچلتيا څرګنده نښه بلل کېږي؛ هغه کړکېچ سره له دې چې د حل لپاره یې بېلابېلې سيمهييزې او څو اړخيزې هڅې شوې دي، خو لا هم بې له روښانه حل لارې یې پایله نهده ورکړې او د تاوتريخوالي د کمېدو هيلې يې لا پسې تتې کړې دي.
