د امریکا د ورمانت ایالت خپلواک سناتور برني سندرز ټینګار کړی، چې امریکا باید د ایراني لاریون کوونکو تر څنګ ودرېږي؛ خو له پوځي مداخلې دې ډډه وکړي. هغه په خپل بیان کې ویلي: «امریکا باید د ایران د خلکو ترڅنګ ودرېږي، نه د هغوی په سر».
نوموړي زیاته کړې، چې پوځي مداخلې په تېرو وختونو کې ناکامه شوې او بیا به هم ناکامه شي. د هغه په وینا؛ ایران په ناارامۍ کې دی او «مېلیونونه خلک د خپل حکومت پر ضد پاڅېدلي دي».
سندرز څرګنده کړې، چې د ایران خلک حق لري خپل راتلونکی وټاکي او امریکا باید د هغوی له مشروع غوښتنو ملاتړ وکړي؛ خو دغه کار باید د جګړې یا پوځي ځواک له لارې ونه شي.
د امریکا د کډوالۍ او ګمرکونو ادارې ویلي، یو افغان چې په ناقانونه توګه امریکا کې مېشت دی او پخوا یې د خپلې خور د وژلو د هڅې په جرم د بند سزا هم تېره کړې؛ په نیویارک ایالت کې نیول شوی دی.
د یادې ادارې په وینا؛ ۳۹ کلن وحیدالله محمد د جنورۍ په لومړۍ نېټه د نیویارک په روچسټر ښار کې ونیول شو. نوموړي په ۲۰۰۸کال کې د چړې په ګوزارونو د خپلې پېغلې خور د وژنې هڅه کړې وه او د دغه جرم له امله یې لس کاله د بند سزا تېره کړې وه.
د راپور له مخې؛ محمد خپله خور ځکه په چړو وهلې وه، چې نوموړې به «نامناسبې جامې» اغوستلې او د شپې تر ناوخته به په «شپني کلپ» کې وه. ځایي چارواکي وایي، محمد په ۲۰۰۴کال کې په قانوني ډول امریکا ته تللی و؛ خو د جزايي محکومیت له امله یې د اوسېدو قانوني موده لغوه شوه.
د کډوالۍ محکمې په ۲۰۱۲کال کې د هغه د شړلو حکم صادر کړی و. امریکایي چارواکو ویلي، چې د خطرناکو مجرمینو د نیولو او اېستلو عملیات به دوام ولري.
د افغانستان کرېکټ بورډ اعلان کړی، چې دوه برېتانوي روزونکي ټابي رېډفورډ او رابرت اهمن یې د ظرفیتلوړونې او بدني چمتووالي په برخو کې د نويو روزونکو په توګه ګومارلي دي.
ټاکل شوې، چې دغه روزونکي د وېسټانډیز پر وړاندې د ۲۰ اوریزو سیالیو له پیل مخکې د افغانستان د کرېکټ ملي لوبډلې سره یوځای شي. د کرېکټ بورډ د معلوماتو له مخې؛ ټابي رېډفورډ د انګلستان د کرېکټ بورډ د څلورمې کچې سند لري او دا مهال د بنګلهدېش غوره لیګ کې د ډهاکا کپېټلز لوبډلې د سر روزونکي په توګه دنده ترسره کوي.
نوموړي د ۲۰۲۲ او ۲۰۲۴کلونو ترمنځ د پاکستان کرېکټ بورډ کې د توپوهنې روزونکي په توګه کار کړی او دارنګه یې له ۲۰۲۰ تر ۲۰۲۲ کلونو پورې د بنګلهدېش کرېکټ بورډ د ظرفیت لوړونې څانګې مشري پر غاړه لرله. رېډفورډ د ۲۰۱۲کال نړۍوال جام پر مهال د وېسټانډیز لوبډلې د روزونکي تجربه هم لري.
رابرت اهمن چې د افغانستان کرېکټ بورډ له لوري بل ټاکل شوی روزونکی دی، هم د بدني چمتووالي متخصص دی. نوموړي پخوا د انګلستان او وېلز کرېکټ بورډ د کړنو د علومو او ورزشي طب څانګې د مشر په توګه دنده ترسره کړې او د انګلستان کرېکټ ملي لوبډلې کې یې د بدني چمتووالي او روغتیايي خدمتونو مسوولیت پر غاړه لاره.
د افغانستان کرېکټ بورډ په وینا؛ رابرت اهمن د ۲۰۱۷ او ۲۰۲۲ کلونو ترمنځ د انګلستان د کرېکټ لوبغاړو د پرمختیایي پروګرامونو برخه و او له وېلز پوهنتون څخه د ورزشي علومو او بدني تمریناتو د ماسټرۍ سند لري.
د افغانستان کرېکټ بورډ ټینګار کړی، سره له دې چې له دغه دواړو روزونکو سره هوکړه شوې؛ خو د ملي لوبډلې د سر روزونکي او د سپین بالرانو لپاره د توپاچونې د روزونکي بستونه لا هم تش دي او د وړ کسانو د جذب هڅې روانې دي.
د افغانستان د کرېکټ ملي لوبډله د وېسټانډیز پر وړاندې د درېیو نړۍوالو شل اوریزو لوبو د ترسره کولو لپاره چمتووالی نیسي. دغه سیالۍ به د جنورۍ په ۱۹مې، ۲۱مې او ۲۲مو نېټو د دوبۍ په ښار کې د افغانستان په کوربهتوب ترسره شي. له دغه سیالیو وروسته به د افغانستان ملي لوبډله د ۲۰۲۶کال شل اوریز نړۍوال جام کې د ګډون لپاره هند او سریلانکا ته سفر وکړي.
د افغانستان د فوټسال ملي لوبډله چې د ۲۰۲۶کال اسیا جام سیالیو کې د پیاوړي حضور لپاره چمتووالی نیسي، خپله لومړۍ روزنیزه لوبه یې په هرات ولایت کې ترسره کړه.
دغه لوبډله چې تر دې وړاندې یې د ایران په مشهد ښار کې روزنیز کمپ لاره، د یاد هېواد د حکومت پر وړاندې د ولسي اعتراضونو له پراخې څپې وروسته افغانستان ته ستنه شوه.
د افغانستان د فوټسال ملي لوبډله به د مهالوېش سره سم د څو ورځو لپاره په هرات ولایت کې تمرین وکړي او څو دوستانه سیالۍ به هم ترسره کړي. تر هغې وروسته به افغان لوبډله کابل ته ستنه شي؛ ترڅو بهرنیو سفرونو ته چمتووالی ونیسي.
د افغانستان د فوټبال فدراسیون دارنګه اعلان کړی، چې د ۲۰۲۶کال د اسیا جام له سیالیو وړاندې د چمتووالي سیالیو په لړ کې به ملي لوبډله د ویتنام ملي لوبډلې پر وړاندې دوه نورې لوبې هم ولري.
یاده لوبډله به د ۱۴۰۴کال (د مرغومي په ۲۶مه) ویتنام ته سفر وکړي او (د مرغومي په ۲۹مه) او د سلواغې په لومړۍ نېټه به د ویتنام د فوټسال ملي لوبډلې پر وړاندې دوه سیالۍ ترسره کړي.
د افغانستان فوټبال فدراسیون منلې، چې د افغانستان د فوټسال ملي لوبډله به د ۱۴۰۴کال د سلواغې په ۵مه نېټه اندونیزیا ته سفر وکړي؛ څو د ۲۰۲۶کال د اسیا جام فوټسال په سیالیو کې برخه واخلي. د دغه سیالیو وروستی پړاو به د ۱۴۰۴کال د سلواغې له ۷مې تر ۱۸مې نېټې پورې (د ۲۰۲۶کال د جنورۍ له ۲۷مې د فبرورۍ تر ۷مې نېټې) د اندونیزیا په کوربهتوب او د ۱۶ لوبډلو په ګډون ترسره شي.
د افغانستان د فوټسال ملي لوبډله په څلورم ګروپ کې د ایران، سعودي عربستان او مالیزیا لوبډلو سره همډلې ده.
د سیالیو بشپړه ډلبندي:
لومړۍ ډله: اندونیزیا، عراق، قرغزستان، سویلي کوریا
دویمه ډله: ټایلنډ، ویتنام، کوېټ، لبنان
درېیمه ډله: جاپان، ازبکستان، تاجکستان، اسټرالیا
څلورمه ډله: ایران، افغانستان، سعودي عربستان، مالیزیا
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، تېره ورځ (د مرغومي ۲۳مه) ۴۰۱ کډوالې کورنۍ چې ټولټال ۲۱۶۵ کسان کېږي؛ له بېلابېلو لارو افغانستان ته ستنې شوې دي. د دغه کمېسیون د معلوماتو پر بنسټ؛ راستنو شویو کورنیو سره اړینې مرستې هم شوې دي.
د دغه کمېسیون د راپور له مخې؛ دغه کډوال د ننګرهار د تورخم، د کندهار د سپین بولدک، د هلمند د بهرامچې، د هرات د اسلامکلا او د نیمروز د ورېښمو پله له لارې ستانه شوي دي. راپور زیاتوي، له یادو کورنیو څخه ۳۱۴ د تورخم له لارې، ۳۸کورنۍ د سپین بولدک له لارې، ۲۷کورنۍ د بهرامچې له لارې، ۱۳کورنۍ د اسلامکلا له لارې او ۹ کورنۍ د ورېښمو پله له لارې افغانستان ته ستنې شوې دي.
له بل پلوه د طالبانو د کډوالو او بېرته راستنېدونکو چارو وزارت خبر ورکړی، چې په تېرې لېندۍ میاشت کې له ایران، ترکیې او پاکستان نه ۲۴۱زره او ۷۸۰ کډوال افغانستان ته ستانه شوي دي.
د دغه وزارت لهخوا په درېیو جلا خپرو شویو خبرپاڼو کې راغلي، چې له دې ډلې له ایران نه ۱۰۶زره او ۴۰۳ کډوال، له ترکیې ۱۶۸۸ او له پاکستان نه ۱۳۳زره او ۶۸۹ کډوال بېرته افغانستان ته ستانه شوي دي.
د افغانستان یوشمېر ورزشکارانو په ایران کې د ولسي اعتراضونو او په دغه هېواد کې د انټرنېټ پرې کېدو په غبرګون کې خپل نظرونه په خواله رسنیو کې شریک کړي دي. د فوټبال ملي لوبډلې پخوانی لوبډلمشر انوش دستګیر، ذکیه خدادادي او شهناز عزیزي هغه څېرې دي چې دغه پېښو ته یې غبرګون ښودلی دی.
انوش دستګیر چې دا مهال د هالنډ د ۱۸ کلنو څخه د کم عمره لوبډلې لوبډلمشر دی، په انسټاګرام کې یې د پیغام او د ایراني کمېډین مکس امیني د خبرو د یوې برخې په بیا خپرولو سره ټینګار کړی، چې د ایران خلک په سړکونو د ازادۍ او بشري حقونو لپاره مبارزه کوي.
ذکیه خدادادي چې د کډوالو لوبډلې د المپیک نړۍوالې کمېټې لومړۍ مډالګټونکې ده، په انسټاګرام پاڼه یې د انټرنېټ پرې کېدو انځور خپور کړی او لیکلي یې دي چې د ولسي اعتراضونو له پراخېدو سره هممهاله ایراني چارواکو انټرنېټ ته لاسرسی بند کړی دی.
همدارنګه، د افغانستان د بدني روزنې لوبغاړې شهناز عزیزي هم یو متن بیا خپور کړی او لیکلي یې دي: «د ایران خلک یوازې د منځني ختیځ لپاره نه جنګېږي؛ هغوی د یوې داسې مبارزې بېرغوال دي، چې د ټولې نړۍ راتلونکی ټاکي».