د المان د کارګرانو سراسري اتحادیې له ایراني ولس سره خپل بې‌قید او شرط پیوستون اعلان کړ

په دغه اعلامیه کې راغلي دي، چې د ځپلو پر وړاندې د خلکو زړوره مبارزه د سیاسي ځپلو، د بشري حقونو د سیستماتیکې سرغړونې، د مستبد حکومت او د دولت د ناغېړۍ پر خلاف وه؛ چې د نفوس پراخه برخه یې د فقر او ناامنۍ کندې ته غورځولي دي.
د المان د کارګرانو سراسري اتحادیې «د سوله‌ییزو اعتراض کوونکو پر وړاندې د رژیم بې‌رحمانه تاوتریخوالي، خپل‌سرو نیونو او وژنو» ته په اشارې سره زیاته کړه، چې دا کړنې په ښکاره ډول ښيي چې «سیاسي مشرتابه خپل مشروعیت له لاسه ورکړی دی». دغه بنسټ ټینګار وکړ، د هغو ټولو کسانو ترڅنګ ولاړ دی چې د کرامت، برابرۍ، د بیان د ازادۍ او ټولنیزو حقونو لپاره مبارزه کوي.
د اعلامیې په یوه برخه کې دې ټکي ته په اشارې سره چې خپلواکې کارګري اتحادیې د یوې ډیموکراتیکې ټولنې له بنسټونو څخه دي، راغلي چې په ایران کې دا ډول اتحادیې په قصدي توګه ځپل کېږي.
د المان د کارګرانو سراسري اتحادیې همدارنګه د دغه هېواد له دولت، اروپايي ټولنې او نړۍوالې ټولنې څخه د اسلامي جمهوریت پر وړاندې د پرېکنده او دوامداره اقداماتو غوښتنه وکړه او په دې برخه کې یې د ترهګرو سازمانونو په نوملړ کې د سپاه پاسداران شاملولو اړتیا ته اشاره وکړه.
دغې اتحادیې ټینګار وکړ، چې د یو ازاد، ډیموکراتیک او سیکولار ایران ته د رسېدو لاره باید پخپله د ایران د خلکو له لوري په سوله‌ییزه، خپلواکه او پرته له بهرنۍ مداخلې وټاکل شي.