امریکا د ایران پر ضد د احتمالي پوځي عملیاتو لپاره چمتووالی بشپړ کړی
د لوړپوړو امریکايي چارواکو د اسراییل سفر په مهال، راپورونه وايي چې امریکا د ایران پر وړاندې د احتمالي پوځي اقدام لپاره خپل ټول پوځي چمتووالی بشپړ کړی، خو وروستۍ پرېکړه لا نه ده شوې.
د امریکا د مرکزي قومندانۍ مشر جنرال برد کوپر تلابیب ته تللی او د اسراییلي پوځ له لوی درستیز ایال زمیر سره یې لیدنه کړې. په دې ناسته کې د اسراییل د پوځي استخباراتو او عملیاتو مشران هم حاضر وو.
کوپر د خبرو پر مهال ویلي چې ولسمشر ټرمپ لا هم د ایران پر ضد د مستقیم پوځي برید وروستۍ پرېکړه نه ده کړې، خو امریکا د احتمالي عملیاتو لپاره ټول اړین تجهیزات او چمتووالی نیولی دی.
