هېګسټ: که ایران له مذاکرې ډډه وکړي، پنتاګون تر بل هر وخت ډېر اقدام ته چمتو دی
د امریکا دفاع وزیر پېټ هېګسټ ایران ته خبرداری ورکړ، چې که چېرې له متحده ایالاتو سره له مذاکرې ډډه وکړي، پنټاګون "تر بل هر وخت ډېر اقدام ته چمتو" دی.
د امریکا دفاع وزیر پېټ هېګسټ ایران ته خبرداری ورکړ، چې که چېرې له متحده ایالاتو سره له مذاکرې ډډه وکړي، پنټاګون "تر بل هر وخت ډېر اقدام ته چمتو" دی.
د هېل ورځپاڼې د راپور لهمخې، هغه په فلوریډا ایالت کې د "بلواوریجین" شرکت په تاسیساتو کې تر وینا وروسته خبریالانو ته وویل: «ولسمشر له هماغه پیله په روښانه توګه ویلي چې ایران باید د اټومي وسلو د ترلاسه کولو وړتیا ونهلري. نو ځکه، یا دوی کولای شي په دې اړه مذاکره وکړي او یا موږ په نورو انتخابونو سره مخکې ځو».
هېګسټ ټینګار وکړ: «د جګړې وزارت بلکل د همدغو انتخابونو لپاره شتون لري».
د متحده ایالاتو د جګړې وزیر دې ته په اشارې سره چې داسې یوې لور ته تلل یې خپله غوښتنه نه ده، زیاته کړه: «زموږ دنده دا ده چې چمتو اوسو او البته چې چمتو هم یو، تر هغه څه چې اړتیا ده ډېر چمتو یو. موږ تل ویلي چې ولسمشر ټرمپ سولې ته ژمن دی او که ایران هوکړې ته د رسېدو لپاره جدي وي، هغه هم هوکړې ته ژمن دی؛ خو باید وکتل شي چې څه کېږي. دا په ایران پورې اړه لري».
هېګسټ په ایران کې د رژیم د بدلون د احتمال په اړه د یوې پوښتنې په ځواب کې له مستقیم ځواب ورکولو ډډه وکړه او استدلال یې وکړ، چې پنټاګون د امر د ورکړې په صورت کې اقدام ته چمتو دی.
هغه وویل: «اوس مهال زموږ دنده دا ده چې چمتو اوسو او ایران دا انتخاب لري چې د خپلو اټومي وړتیاوو په اړه مذاکره وکړي او که نه».
