د طالبانو کابینې په پلان شویو پروژو کې د پراختیایي بودجې پر مصرف ټینګار کړی
د طالبانو د ریاست الوزرا ملامحمد حسن په مشرۍ ددې ډلې د کابینې غونډه کې د پراختیایي بودجې د لګولو او د افغان کډوالو ستونزو ته د رسېدنې په اړه بحث شوی.
د طالبانو د ریاست الوزرا ملامحمد حسن په مشرۍ ددې ډلې د کابینې غونډه کې د پراختیایي بودجې د لګولو او د افغان کډوالو ستونزو ته د رسېدنې په اړه بحث شوی.
د طالبانو تر واک لاندې ارګ نن سې شنبه، د سلواغې پر ۱۴مه لیکلي، چې ددې ډلې د کابینې څوارلسمه غونډه پرون ترسره شوې ده.
په ناسته کې د پراختیایي بودجې د مصرف راپور تایید او اړوندو ادارو ته لارښوونه شوې، چې پراختیایي بودجه په پلان شویو پروژو کې پر وخت مصرف او پراختیایي چارې دې په ښه توګه له پلان سره سمې پر مخ یووړل شي.
دغه راز په یاده غونډه کې د افغان کډوالو ستونزو ته د رسېدنې په اړه بحث شوی او اړوندو ادارو ته دنده سپارل شوې، چې ستونزو ته د رسېدنې په موخه دې حل لارې وموندل شي.
په دې وروستیو کې له پاکستان او ایران څخه د افغان کډوالو اېستلو پروسه چټکه شوې ده.
د ملګرو ملتونو د کډوالو عالي کمېشنرۍ تازه ویلي، چې د ۲۰۲۵کال له جنورۍ تر نومبر پورې شاوخوا ۱.۸میلیونه افغانان له ایران او نږدې ۹۰۰زره نور له پاکستان څخه افغانستان ته ستانه شوي دي.
