د هسپانیا لومړی وزیر: هیواد به یې تل د افغان مېرمنو غږ وي
د هسپانیا لومړي وزیر، پډرو سانچیز، د ښځو د نړیوالې ورځې په درشل کې ویلي چې هیواد به یې تل د افغان مېرمنو غږ پاتې شي.
هغه د افغان ښځو د حقونو فعالانو ته په خطاب کې وویل: «تاسو به تل په هسپانیا کې ځای ولرئ ترڅو خپله میړانه او عزت څرګند کړئ، تر هغه وخته چې افغانستان ته بیرته ستانه شئ.»
سانچیز د شنبې په ورځ پر ایکس خواله رسنۍ د ښځو د حقونو د یوې فعالې یادښت شریک کړی او ټینګار یې کړی چې هیواد به یې د هغو ښځو ملاتړ وکړي ترڅو چې بیرته خپلو کورنیو ته ستنې شي.
هغه افغان مېرمنو ته ویلي: «هیڅوک هیڅکله نه شي کولی چې تاسو له پامه وغورځوي.»
د هسپانیا حکومت د همدې موخې لپاره د بهرنیو چارو په وزارت کې یوه ځانګړې خونه د «افغان ښځو او نجونو» په نوم پرانیستې، چې د بهرنیو چارو وزیر یې د هغو ښځو او نجونو د مبارزې د ستاینې په توګه یاد کړه چې د خپلو حقونو او ازادیو لپاره هڅې کوي.
