امریکا له خپلو زېرمو څخه ۱۷۲ میلیونه بېلره تېل بازار ته عرضه کوي
د امریکا د انرژۍ وزیر کریس رایټ وايي، امریکا به د تېلو د بیو د راټیټولو په موخه له خپلو ستراتیژیکو زېرمو څخه ۱۷۲ میلیونه بېلره تېل بازار ته عرضه کړي.
د انرژۍ نړۍوال اژانس چې امریکا یې یو له بنسټ اېښودونکو غړو څخه دی، اعلان کړی چې ۳۲ غړي هېوادونه یې په ټولییزه توګه بازار ته د ۴۰۰ میلیونه بېلره تېلو پر وړاندې کولو هوکړه کړې ده.
رایټ په یوه خبرپاڼه کې ویلي: «ولسمشر ټرمپ د انرژۍ وزارت ته اجازه ورکړه چې له راتلونکې اوونۍ څخه د تېلو له ستراتیژیکو زېرمو ۱۷۲ میلیونه بېلره بازار ته عرضه کړي».
همدارنګه نوموړي زیاته کړې: «بازارونو ته د دغه اندازې تېلو رسول به د پلان شویو قیمتونو پر بنسټ شاوخوا ۱۲۰ ورځې وخت ونیسي».
د رایټ له بیانیې څو ساعته وړاندې د امریکا ولسمشر ډونالډ ټرمپ اعلان کړی و، چې امریکا به له خپلو بېړنیو زېرمو څخه د تېلو د هغو بیو د راټیټولو لپاره کار واخلي، چې له ایران سره د جګړې پر مهال لوړې شوې دي.
