پاکستان په کابل کې د وسلو زیرمې او که د امید مرکز روږدي په نښه کړل؟

یوناما وویل، چې په برید کې لسګونه خلک وژل شوي او ټپیان شوي دي.

یوناما د وژل شویو کسانو له کورنیو سره خپله ژوره خواخوږي څرګنده کړې او ټپیانو ته یې د ژر تر ژره رغېدو هیله کړې ده.

یوناما ویلي، د نړیوالو قوانینو له مخې د جګړې ټولې خواوې مکلفې دي چې ناروغان، ټپیان، روغتیايي کارکوونکي، روغتونونه او امبولانسونه خوندي وساتي او پر روغتونونو او ملکي تاسیساتو بریدونه په کلکه منع دي.

د ملګرو ملتونو استازځي زیاته کړې، چې په ټول افغانستان کې ملکي وګړي لا هم د افغانستان او پاکستان ترمنځ د روانو نښتو بیه پرې کوي.

یوناما د فبرورۍ له ۲۶مې راهیسې او د مارچ د ۱۶مې تر پېښې مخکې ورځې پورې لږ تر لږه د ۷۶ ملکي افغانانو د وژل کېدو او ۲۱۳ نورو د ټپي کېدو پېښې ثبت کړې دي.

یوناما یو ځل بیا د تاوتریخوالي د کمېدو، سملاسي اوربند، او د نړیوالو قوانینو د رعایتولو غوښتنه کوي، څو د ملکي وګړو خوندیتوب یقیني شي.

د روغتیا د نړیوال سازمان مشر تدروس ادهانوم ګبریسوس په خپل اېکس کې لیکلی، چې د افغانستان او پاکستان ترمنځ د شخړو د زیاتوالي له امله د فبروري له وروستیو راهیسې په افغانستان کې لږ تر لږه ۶ روغتیايي مرکزونه اغیزمن شوي دي.

نوموړي له ټولو خواوو څخه غوښتنه کړې ده، چې تاوتریخوالی کم کړي او سولې او روغتیا ته لومړیتوب ورکړي.

د پاکستان د اطلاعاتو او نشراتو وزیر ادعا کړې، چې په دغو بریدونو کې د طالبانو پوځي مرکزونه او د وسلو زېرمې په نښه شوې دي، خو طالبانو تېره شپه اعلان وکړ، چې د امید د روږدو درملنې پر روغتون برید کې ۴۰۰ تنه وژل شوي او ګڼ نور ټپیان دي.

پاکستاني رسنیو ویلي، چې په بریدونو کې په سرک نو کې د طالبانو د استخباراتو تخنیکي دفتر، په چمن حضوري او دارالامان کې پوځي لوا او د مهماتو زیرمې او د شاه شهید په سیاه سنګ کې یوه پوځي برخه او په کارته نو کې د طالبانو دفاع وزارت اړوند د ساتنې واحد په نښه شوي دي.

طالبانو تراوسه یوازې د امید روغتون یوې برخې د برید پخلی کړی دی.

د نورو سیمو د هدف ګرځولو او د بریدونو له امله د اوښتو زیانونو په تړاو تردې دمه طالبانو معلومات نه دي ور کړي.

په ننګرهار کې هم د ګوشتې، اچین او نازیان ولسوالیو پرسرحدي لواوو او مرکزونو او په غني خېلو کې د ۲۰۱ قول اردو اړوند پر دویمې لوا د بریدونو خبر ورکړل شوی.

په کابل کې دا د پاکستان تېرو هوايي بریدونو ته تر تولو سخت بریدونه ګڼل کیږي.

د طالبانو ویاند ذبیح الله مجاهد له بریدونو وروسته په یوه مرکه کې وویل، چې د خبرو اترو او ډيپلوماسۍ وخت تېر شوی او اوس د غچ اخېستنې وخت دی.

تراوسه طالبانو د غچ اخېستنې اقدام نه دی کړی، خو په کوټه او راولپنډۍ کې د دوو ډرون الوتکو د الوتنې او یوې د غورځېدو خبر ورکړل شوی دی.

د کابل اوسیدونکو افغانستان انټرنشنل ته په سیمه ییز وخت شاوخوا۸:۵۰ بجې وویل چې دوی د یوې جنګي الوتکې د غږ تر اورېدو وروسته په کابل کې لږترلږه دوې زورورې چاودنې واورېدې، چې غږ یې د کابل په ډېرو سیمو کې واورېدل شو.

د طالبانو مرستیال ویاند حمدالله فطرت ویلي چې پاکستان د امید په نوم د روږدو کسانو د درملنې مرکز په نښه کړی، چې شاوخووا ۴۰۰ کسان پکې وژل شوي او ۲۵۰ نور ټپيان شوي دي. په یاد مرکز کې د شاوخوا ۲۰۰۰ کسان درملنه کېده.

پاکستان پر طبي تاسیساتو د برید ادعا رد کړې او زیاته کړې یې ده چې «په کابل او د ننګرهار ولایت کې یې په دقیق ډول پوځي تاسیسات او د وسله والو د ملاتړ مرکزونه په نښه کړي دي.»

تر اوسه په کابل کې د ملګرو ملتونو مرستندویه پلاوی (یوناما) دفتر په دې اړه کوم راپور نه دی خپور کړی.

د بشري حقونو فعالانو د دې پېښې په اړه د خپلواکو او بې‌طرفه نړیوالو بنسټونو د څېړنې غوښتنه کړې ده.

محمد نبي عمري پاکستان ته به خطاب کې وویل: «پاکستان که غواړي په خپل هېواد کې امن راولي زموږ ورته مشوره ده چې په خپله خاوره کې د الله کتاب حاکم کړي». د هغه په خبره چې په دې سره به د غلا، تښتونې، غلامۍ، پورونو او وسله والو فعالیتونو خلاص شي.

عمري زیاته کړه چې که پاکستان په خپله خاوره کې د «انګریز او امریکا قانون او غلامي» وي دغه هېواد به هیڅ وخت د ارام ساه وا نه خلي.

نوموړي وروستیو ناامنه پېښو ته په اشاره ویلي چې موږ په هر ډول د خپل ولس دفاع کوو او «څه چې کرې بیا یې رېبلو ته هم فکر وکه»

هغه د قربانیانو کورنیو ته د تسلیت تر څنګ له هغو غوښتې چې ټول وژل شوي په یوه مقبره کې دفن کړي تر څو نسلونو ته د پاکستان «ظلم» یاد وي.