د روغتیا نړیوال سازمان وايي چې په کابل کې د معتادینو پر روغتون د برید پلټنه کوي

د پاکستان د اطلاعاتو او نشراتو وزیر ادعا کړې، چې په دغو بریدونو کې د طالبانو پوځي مرکزونه او د وسلو زېرمې په نښه شوې دي، خو طالبانو تېره شپه اعلان وکړ، چې د امید د روږدو درملنې پر روغتون برید کې ۴۰۰ تنه وژل شوي او ګڼ نور ټپیان دي.

پاکستاني رسنیو ویلي، چې په بریدونو کې په سرک نو کې د طالبانو د استخباراتو تخنیکي دفتر، په چمن حضوري او دارالامان کې پوځي لوا او د مهماتو زیرمې او د شاه شهید په سیاه سنګ کې یوه پوځي برخه او په کارته نو کې د طالبانو دفاع وزارت اړوند د ساتنې واحد په نښه شوي دي.

طالبانو تراوسه یوازې د امید روغتون یوې برخې د برید پخلی کړی دی.

د نورو سیمو د هدف ګرځولو او د بریدونو له امله د اوښتو زیانونو په تړاو تردې دمه طالبانو معلومات نه دي ور کړي.

په ننګرهار کې هم د ګوشتې، اچین او نازیان ولسوالیو پرسرحدي لواوو او مرکزونو او په غني خېلو کې د ۲۰۱ قول اردو اړوند پر دویمې لوا د بریدونو خبر ورکړل شوی.

په کابل کې دا د پاکستان تېرو هوايي بریدونو ته تر تولو سخت بریدونه ګڼل کیږي.

د طالبانو ویاند ذبیح الله مجاهد له بریدونو وروسته په یوه مرکه کې وویل، چې د خبرو اترو او ډيپلوماسۍ وخت تېر شوی او اوس د غچ اخېستنې وخت دی.

تراوسه طالبانو د غچ اخېستنې اقدام نه دی کړی، خو په کوټه او راولپنډۍ کې د دوو ډرون الوتکو د الوتنې او یوې د غورځېدو خبر ورکړل شوی دی.

د کابل اوسیدونکو افغانستان انټرنشنل ته په سیمه ییز وخت شاوخوا۸:۵۰ بجې وویل چې دوی د یوې جنګي الوتکې د غږ تر اورېدو وروسته په کابل کې لږترلږه دوې زورورې چاودنې واورېدې، چې غږ یې د کابل په ډېرو سیمو کې واورېدل شو.

د طالبانو مرستیال ویاند حمدالله فطرت ویلي چې پاکستان د امید په نوم د روږدو کسانو د درملنې مرکز په نښه کړی، چې شاوخووا ۴۰۰ کسان پکې وژل شوي او ۲۵۰ نور ټپيان شوي دي. په یاد مرکز کې د شاوخوا ۲۰۰۰ کسان درملنه کېده.

پاکستان پر طبي تاسیساتو د برید ادعا رد کړې او زیاته کړې یې ده چې «په کابل او د ننګرهار ولایت کې یې په دقیق ډول پوځي تاسیسات او د وسله والو د ملاتړ مرکزونه په نښه کړي دي.»

تر اوسه په کابل کې د ملګرو ملتونو مرستندویه پلاوی (یوناما) دفتر په دې اړه کوم راپور نه دی خپور کړی.

د بشري حقونو فعالانو د دې پېښې په اړه د خپلواکو او بې‌طرفه نړیوالو بنسټونو د څېړنې غوښتنه کړې ده.

محمد نبي عمري پاکستان ته به خطاب کې وویل: «پاکستان که غواړي په خپل هېواد کې امن راولي زموږ ورته مشوره ده چې په خپله خاوره کې د الله کتاب حاکم کړي». د هغه په خبره چې په دې سره به د غلا، تښتونې، غلامۍ، پورونو او وسله والو فعالیتونو خلاص شي.

عمري زیاته کړه چې که پاکستان په خپله خاوره کې د «انګریز او امریکا قانون او غلامي» وي دغه هېواد به هیڅ وخت د ارام ساه وا نه خلي.

نوموړي وروستیو ناامنه پېښو ته په اشاره ویلي چې موږ په هر ډول د خپل ولس دفاع کوو او «څه چې کرې بیا یې رېبلو ته هم فکر وکه»

هغه د قربانیانو کورنیو ته د تسلیت تر څنګ له هغو غوښتې چې ټول وژل شوي په یوه مقبره کې دفن کړي تر څو نسلونو ته د پاکستان «ظلم» یاد وي.

سید اکبر اغا په خپل ایکس پوسټ کې لیکلي چې تېره شپه د پاکستان له‌خوا په کابل کې د معتادینو پر یوه روغتون «ظالمانه او وحشیانه» بمباري شوې چې له امله یې زیات ملکي تلفات اوښتي دي.

هغه دا برید د اسلامي ارزښتونو پر خلاف بللی او پوښتنه یې کړې چې ولې د پاکستان دیني عالمان د دې پېښې په اړه چوپ پاتې دي. د هغه په وینا، «ایا دغو علماوو ته د دنیا او آخرت مسولیت نه راجع کېږي؟»

نوموړي وړاندیز کړی چې له غیرحکومتي دیني عالمانو سره باید اړیکه ونیول شي، څو د خپل حکومت پر کړنو فکر وکړي او خپل مسولیت ادا کړي.

هغه همداراز د اسلامي همکاریو سازمان او ملګرو ملتونو پر چوپتیا نیوکه کړې او ویلي یې دي چې، سره له دې چې په افغانستان کې د یوناما دفتر شتون لري او معلومات شریکوي، خو تر اوسه عملي اقدام نه دی شوی.

سید اکبر اغا ټینګار کړی چې طالبان باید په داسې حالاتو کې له خلکو سره نږدې اړیکه وساتي او د ملت ملاتړ ترلاسه کړي، ځکه د هغه په وینا، «په ملت کې ډېر مخلص خلک شته» چې کولی شي د حکومت پالیسۍ بریالۍ کړي.

افراسیاب خټک په خپل ایکس پوسټ کې لیکلي: «په کابل کې د پاکستان د بمبارۍ له امله د متعادینو مرکز کې د ناروغانو قتل عام د غندنې وړ دی. زموږ فکرونه او دعاوې د قربانیانو له کورنیو سره دي.»

هغه زیاته کړې چې د روغتونونو په نښه کول هر ځای کې جرم دی او دا ډول کړنې د نړیوالو بشري اصولو ښکاره سرغړونه ده.

نوموړي همداراز ویلي: «د ترهګرۍ پر ضد جګړه د نسل وژنې لپاره یو پټ نوم (پرده) ګرځېدلې ده.»