په پاکستان کې د افغانستان پخواني سفیر محمد عمر داودزی، وایي چې د پاکستان له لوري پر افغانستان پرلهپسې هوايي بریدونه نورې جلا پېښې نه دي، بلکې «د دواړو هېوادونو ترمنځ اعلان شوې جګړه» ده، او ټینګار کوي چې افغانان باید د دې وضعیت په وړاندې ملي یوالی رامنځته کړي.
داودزي دا څرګندونې د ایکس له لارې په یوه تفصیلي پوسټ کې کړې دي. هغه لیکلي چې د افغانستان پر هوايي حریم د پاکستان تکراري تېری او په لویو ښارونو هوایي بریدونه «د ورځې معمول» ګرځېدلې ده.
نوموړي د سیاسي مشرانو پر غبرګون هم نیوکه کړې او ویلي یې دي چې یوازې غندنه بسنه نه کوي. د ده په وینا: «تش غندل د درد دوا نه ده، وخت را رسېدلی چې ملت ته مراجعه وشي او په دې اړه ملي یوالی رامنځته شي.»
داودزي ټینګار کړی چې روان وضعیت نور د څو محدودو پېښو بڼه نه لري، بلکې دا «دوه اړخیزه جګړه» ده. هغه ویلي: «دا اوس د دوو ډلو یا رژیمونو ترمنځ نه، بلکې د دوو هېوادونو ترمنځ جګړه ده.»
هغه همداراز ادعا کړې چې پاکستان د افغانستان پر وړاندې له پوځي اقداماتو مخکې نړیواله او کورنۍ اجماع برابره کړې ده. د هغه په خبره، ان د ډونالډ ټرمپ ملاتړ هم ترلاسه شوی او په اسلاماباد کې د علماوو او سیاسي مشرانو غونډې جوړې شوې دي.
داودزي دغه ادعاوې «بهانې» بللې او ویلي یې دي چې د پاکستان موخې ژورې او خطرناکې دي. نوموړي خبرداری ورکړی چې د افغانانو ترمنځ تفرقه به وضعیت لا خراب کړي او زیاته کړې یې ده چې «متفرق لوری به ډېر تاوان ګالي.»
هغه په پای کې له افغانانو غوښتي چې د دښمن په ګټه کار ونه کړي او ویلي یې دي، هر څوک چې داسې وکړي، «تاریخ او ملت به یې ونه بښي.»
