په سریلانکا کې د افغانستان پخواني سفیر، محمد اشرف حیدري، وایي چې پاکستان له ۲۰۲۱ کال مخکې د طالبانو د ملاتړ او وروسته د مستقیمو بریدونو او هوايي بمبارۍ له لارې افغان ملکي وګړو ته پرلهپسې زیان رسولی، او ټینګار کوي چې د دې تاوتریخوالي د درولو لپاره حسابورکونه ضروري ده.
ښاغلي حیدري دا څرګندونې د ایکس له لارې په یوه تفصیلي پوسټ کې کړې دي. هغه لیکلي چې د افغانستان ګڼې ټولنې د وژنو، بېځایه کېدو او د ملکي تاسیساتو د ویجاړېدو له پرلهپسې څپو سره مخ شوې دي، او دا وضعیت «نه جلا پېښې دي او نه هم پټې».
د نوموړي په وینا، دا حقایق د سیمې او له سیمې بهر د استخباراتي بنسټونو ته ښه معلوم دي او څو ځله د د ملګرو ملتونو د افغانستان مرستندویه پلاوي په راپورونو کې هم انعکاس موندلی، خو د نړیوال غبرګون کچه تر ډېره د راپورونو، لنډو معلوماتي ناستو او د اندېښنې تر څرګندونو محدوده پاتې شوې ده.
حیدري همداراز نیوکه کړې چې د ملګري ملتونه اړوند سیاسي، بشري حقونو او بشري مرستو بنسټونه، په ځانګړي ډول د امنیت شورا او دارالانشاء، تر اوسه د افغان ملکي وګړو پر وړاندې د ځینو خونړیو بریدونو په اړه «خپلواکه او هر اړخیزه څېړنه» نه ده پیل کړې.
هغه په خپل پوسټ کې ویلي چې دغه بریدونه لومړی د پاکستان له ملاتړه برخمنو طالبانو له لوري او په وروستیو کې د پاکستان د مستقیمو پوځي اقداماتو له لارې ترسره شوي دي.
د حیدري په ټکو، که حسابورکونه رامنځته نه شي، نو د افغان ملکي وګړو پر وړاندې د تاوتریخوالي دا لړۍ به «بې له کوم خنډه» دوام ومومي.
