اکسیوس: سپاه پاسداران په هُرمز تنګي کې نور ماینونه ځای پر ځای کړي دي
امريکايي رسنۍ اکسیوس د يو امريکايي چارواکي او يو باخبره سرچينې له قوله راپور ورکړی، چې د سپاه پاسداران سمندري ځواک په روانه اوونۍ کې د هُرمز په تنګي کې نور سمندري ماینونه ايښي دي.
د اکسیوس د راپور له مخې، دا دویم ځل دی چې د جګړې له پيل راهيسې اسلامي جمهوريت په دې تنګي کې ماینونه ځای پر ځای کوي، او تر اوسه څرګنده نه ده چې د لومړۍ مرحلې ټول ماینونه پېژندل شوي او پاک شوي دي که نه.
اکسیوس زياته کړې، چې د امريکا پوځ د اسلامي جمهوريت د مایناېښودنې عمليات درک کړي او په دقت سره يې څاري. يو امريکايي چارواکي ويلي چې واشنګټن د نويو ماینونو له شمېر څخه خبر دی، خو د هغې جزیيات يې نه دي افشا کړي.
