د سپین بولدک یو اوسېدونکی: یوه مافیایي ډله ځايي طالبانو سره په ګډه خلکو ته ستونزې جوړوي

دغه ادعا د افغانستان انټرنشنل له‌خوا په خپلواکه توګه هم تایید شوې ده.

سرچینې ویلي، چې یادې ډلې لومړی پر یوې شتمنې کورنۍ یا سوداګر د پور، د ځمکې د ملکیت او یا نورو تورونو دعوه کوي، بیا موضوع د طالبانو پولیسو او محکمې ته وړي او د «فیصلې» په بدل کې پیسې غواړي. هغه زیاتوي، چې له شکایت کوونکو څخه ترلاسه شوې پیسې د دعوې په لړ کې «شریکان» خپل منځ کې وېشي.

د ده په وینا، عام خلک، دولتي کارکوونکي او نظامیان له دې وضعیت څخه خبر دي، خو تر اوسه رسمي اقدام نه‌دی شوی.

یاد اوسېدونکی ادعا کوي، که څوک له دغو غوښتنو سره موافقه ونه کړي، نو د محکمې له حکم پرته په میاشتو میاشتو بندي ساتل کېږي.

ده وویل، چې د طالبانو لوړ پوړي امنیتي غړي او ځینې قاضیان شکایت کوونکو ته مشوره ورکوي، چې له دې ډلې سره «کښیني» او یو مقدار پیسې ورکړي، ګنې «ډېر عذاب» به وویني. نوموړي ټینګار کړی، چې د «حکومت ټول چارواکي» د دې ډلې غړي نه‌دي، خو ځینې کسان ورسره همکاري کوي.

تر دې وړاندې د هېواد په یو شمېر نورو ولایتونو کې هم ورته شکایتونه شوي دي.