د ملګرو ملتونو د بشري چارو د همغږۍ دفتر (اوچا) په خپل تازه خپور کړي راپور کې ویلي، چې د اپریل میاشتې پر مهال د طالبانو لاسوهنو، د مرستندویه کارکوونکو پر وړاندې محدودیتونو او د لاسرسي نورو خنډونو په افغانستان کې د بشري مرستو ۴۸عملیات ځنډولي او یا یې هم ګډوډ کړي دي.
د راپور له مخې، اوچا د اپرېل په میاشت کې د بشري لاسرسي ۶۶پېښې ثبت کړې چې د مارچ میاشتې په پرتله ۲۳سلنه کموالی ښيي. خو دغه بنسټ ټینګار کوي چې دا کموالی د وضعیت د ښهوالي نښه نه ده، بلکې تر ډېره د طالبانو او پاکستان ترمنځ د نښتو د کمېدو له امله رامنځته شوی دی.
راپور وایي چې په ثبت شویو پېښو کې د مرستندویه چارو لاسوهنې، د تګ راتګ محدودیتونه، د بشري کارکوونکو او تاسیساتو پر وړاندې تاوتریخوالی او پوځي عملیات شامل دي. د ثبت شویو ۶۶پېښو له ډلې ۴۸یې د مرستو د ځنډېدو سبب شوې دي.
اوچا ویلي، د طالبانو لاسوهنې تر ټولو لوی خنډ پاتې شوی او د ټولو ثبت شویو پېښو نږدې ۷۰سلنه جوړوي. د راپور له مخې، مرستندویه ادارو د تفاهملیکونو په لاسلیک کې ځنډ، د مرستو په پروګرامونو کې لاسوهنه او د کارکوونکو د ګومارنې په برخه کې محدودیتونه راپور کړي دي.
همداراز ویل شوي چې ځینو مرستندویه بنسټونو شکایت کړی چې طالب چارواکو له دوی څخه د حساسو معلوماتو، لکه د کارکوونکو نوملړ او د پروژو اسناد غوښتي دي.
راپور زیاتوي چې د ښځینه مرستندویه کارکوونکو پر وړاندې محدودیتونوهم د بشري مرستو بهیر اغېزمن کړی دی. د اپرېل په میاشت کې لس جنسیتي اړوندې پېښې ثبت شوې چې پکې پر ښځینه کارکوونکو محدودیتونه، د بشري فعالیتونو پر وړاندې خنډونه، په جلالاباد کې د قابلګۍ روزنې پروګرامونو کې لاسوهنه، په هرات کې د محدودیتونو زیاتوالی او د ښځینه کارکوونکو نیول شامل دي.
د راپور له مخې، بلخ ولایت د لاسرسي د ستونزو له پلوه تر ټولو ډېرې پېښې لرلې چې شمېر یې ۱۷ته رسېږي، ورپسې زابل له ۱۰او هرات له شپږو پېښو سره یاد شوي دي.
اوچا دا هم ویلي چې امنیتي اندېښنې، خراب موسم، سېلابونه او د لارو زیانمنېدل هم د مرستو د رسولو پر بهیر منفي اغېز کړی او د روغتیايي ټیمونو او ټولنیزو کلینیکونو تګ راتګ یې اغېزمن کړی دی.
دغه راپور په داسې حال کې خپرېږي چې افغانستان لا هم د نړۍ له سترو بشري بحرانونو سره مخ دی او میلیونونه وګړي د اقتصادي ستونزو، اقلیمي پېښو او له ګاونډیو هېوادونو د کډوالو د راستنېدو له امله بشري مرستو ته اړتیا لري.
