د بلوڅانو د یووالي غورځنګ (بلوڅ یووالي کمېټې) ویلي، چې د دې غورځنګ د مشرې ماهرنګ بلوچ او د هغې د ملګرو پر ضد په ثبت شویو قضیو کې رڼې او عادلانه څېړنې نه ترسره کېږي، نو له همدې امله ماهرنګ بلوچ او ملګرو یې په زندان کې دننه اعتراضي پرلت پیل کړی دی.
د ماهرنګ بلوچ او د هغې د ملګرو مدافع وکیلانو له رسنیو سره په خبرو کې ویلي، چې له تېرو شاوخوا لسو میاشتو راهیسې د هغوی وکالت کوي او د ماهرنګ بلوچ او ملګرو پر ضد یې په ټول بلوچستان کې ۵۱ قضیې ثبت شوې دي.
دوی وویل، که څه هم دا عادي قضیې دي، خو څېړنې یې د ترهګرۍ ضد محکمو کې ترسره کېږي. د دوی په وینا، د شنبې په ورځ (د غبرګولي ۲۳مه) چې د قضیو د اورېدنې لپاره زندان ته ورغلل، نو هلته د تورنو بندیانو د قضیو اورېدنه د هغوی له حضور پرته تنظیم شوې وه.
وکیلانو زیاته کړه، چې دا چاره له قانون څخه ښکاره سرغړونه ده. د دوی په وینا، په پیل کې د دوی قضیې نه اورېدل کېدې، وروسته یې په زندان کې دننه د اورېدنو لړۍ پیل شوه، خو اوس هغه بهیر هم درول شوی دی؛ نه تورن کسان خپل وکیلان ویني، نه وکیلان قاضي ویني او ان تر دې چې هېڅوک له یو بل سره مخامخ اړیکه نهلري.
هغوی همداراز وویل، چې تورنو کسانو د یادې محکمې پر بهیر نیوکې کړي او د قاضي د بدلولو لپاره یې عریضې هم وړاندې کړي، خو د هغو عریضو ته هېڅ پام نهدی شوی.
د بلوڅ یووالي کمېټې استازو غوښتنه کړې، چې د ماهرنګ بلوچ او نورو پر ضد د ثبت شویو قضیو اورېدنې دې په رڼه، عادلانه او بېطرفه توګه ترسره شي.
