د طالبانو د صنعت او سوداګرۍ وزارت وایي، تېرکال له افغانستان نه شاوخوا ۲۹۰زره ټنه تازه مېوه بهر ته صادره شوې ده. د یاد وزارت ویاند احسانالله احسان ویلي، چې دغه مېوې هند، قطر، متحده عربي اماراتو، د منځنۍ اسیا هېوادونو، روسیې او یوشمېر اروپایي هېوادونو ته صادرې شوې دي.
د هغه په وینا؛ د دغه صادراتو ټولیز ارزښت ۱۴۱ مېلیونه امریکایي ډالرو ته رسېږي. د شمېرو له مخې؛ مڼې د ۴۴ مېلیون ډالرو په ارزښت د افغانستان د تازه مېوو د صادراتو په سر کې ځای لري، ورپسې انګور د ۴۱ مېلیون ډالرو په ارزښت دویم او انار درېیم مقام خپل کړی دی.
د طالبانو د صنعت او سوداګرۍ وزارت همداراز وایي، د تېرکال پرتله د زردالو او توتانو صادرات هم دوه برابره زیات شوي دي. د افغان سوداګرو په وینا؛ تر دې وړاندې د افغانستان تازه مېوې د پاکستان له لارې نورو هېوادونو ته صادرېدې، خو اوس د کړکېچنو اړیکو له امله دغه صادرات عربي هېوادونو، منځنۍ اسیا او اروپا ته اړول شوي دي.
ورته مهال په هرات کې د طالبانو د سوداګرۍ او پانګونې ریاست خبر ورکړی، چې د روان کال په لومړیو درېیو میاشتو کې له دغه ولایت څخه ۵۳زره ټنه خوراکي او غیرخوراکي توکي امریکا، اروپا، اسیا او د سیمې یوشمېر هېوادونو ته صادر شوي دي.
