د کښتۍ چلوونې معلومات ښيي، چې د امریکا لهخوا د ایران د بندرونو د سمندري کلابندۍ له بیا پیل وروسته په لومړۍ ورځ د هرمز تنګي له لارې د تېرېدونکو بېړیو شمېر د تېرې ورځې پرتله نږدې نیمایي ته راټیټ شوی دی. ورته مهال د ایران او امریکا ترمنځ په فارس خلیج کې پوځي بریدونه هم دوام لري.
د رویټرز د راپور له مخې؛ د کپلر د بېړیو څار شرکت د معلوماتو له مخې د چهارشنبې په ورځ یوازې ۷ بېړۍ له هرمز تنګي تېرې شوې، په داسې حال کې چې یوه ورځ مخکې دغه شمېر ۱۳ و.
د دغه معلوماتو له مخې؛ د چهارشنبې په ورځ ډېری تېرېدونکې بېړۍ د ایران د اوبو له لارې تېرې شوې. دغه کمښت په داسې حال کې ثبت شوی، چې امریکا د ایران د بندرونو سمندري کلابندي بېرته پیل کړې او د دواړه هېوادونو ترمنځ په فارس خلیج کې پوځي نښتې هم زیاتې شوې دي.
رویټرز لیکلي، کړکېچ د شنبې ورځې له وروستیو راهیسې هغه مهال زیات شو چې د ایران حکومت اعلان وکړ د هرمز تنګی یې تړلی دی. د دواړه خواوو پوځي عملیاتو د دغه مهمې سمندري لارې د بېړیو په تګراتګ کې خنډونه رامنځته کړي دي.
د جګړې له پیل مخکې د نړۍ شاوخوا پنځمه برخه د تېلو او ګازو صادرات د هرمز تنګي له لارې ترسره کېدل. د کپلر د معلوماتو له مخې؛ د چهارشنبې په ورځ څلور تشې بېړۍ فارس خلیج ته ننوتې، له دې ډلې درې کوچنۍ تېل وړونکې بېړۍ او یوه د غلو دانو بار وړونکې بېړۍ شاملې وې.
همدارنګه هغه درې بېړۍ چې په همدې ورځ له هرمز تنګي ووتلې، اوبلن پټرولیم ګاز، ډبروسکاره او تېل لېږدول. رویټرز راپور ورکړی، چې د سېشنبې په ورځ د سویزمکس په نوم یوه تېل وړونکې بېړۍ چې د سعودي عربستان یو مېلیون بېرله خام تېل یې لېږدول د هرمز تنګي له لارې داسې تېره شوه، چې د خپلې پېژندنې اتومات سیستم یې بند کړی و.
د کپلر د معلوماتو له مخې؛ د چهارشنبې په ورځ د خامو تېلو لېږدوونکې او همدارنګه د اوبلن طبیعي ګاز لېږدوونکې هیڅ بېړۍ له هرمز تنګي نهدي تېرې شوې.
