د افغان کډوالو تر وتلو وروسته؛ په بلوچستان کې د غالۍ اوبدلو صنعت د لهمنځه تلو له ګواښ سره مخ دی
افغانستان انټرنشنل ـ پښتو، بلوچستان
د بلوچستان د غالۍ اوبدلو کاروباریان وایي، له پاکستان نه د افغان کډوالو د وتلو او د افغانستان ـ پاکستان ترمنځ د لارو تړل پاتې کېدو له امله په دغه ایالت کې د غالۍ اوبدلو صنعت د لهمنځه تلو له ګواښ سره مخ شوی دی.
په کوټه کې د غالۍ اوبدلو کاروبار سره تړلی خدانظر افغانستان انټرنشنل پښتو ته ویلي، پخوا په کوټه کې د لاسي غالیو ګڼ بازارونه وو؛ خو اوس د ګوتو په شمېر یوازې څلور هټۍ پاتې دي.
هغه وویل، سیمهییز غالۍ اوبدونکي هغه مهارت او امکانات نهلري چې افغان کارګرو لرل او که اوسنی وضعیت همداسې دوام وکړي؛ نو دغه صنعت به په بشپړه توګه لهمنځه ولاړ شي.
د نوموړي په وینا؛ د افغان کډوالو تر وتلو سربېره د افغانستان او پاکستان ترمنځ د لارې تړل کېدو هم دغه صنعت ته سخت زیان رسولی، ځکه پخوا به د غالیو لپاره وړۍ له افغانستان نه راتلې؛ خو اوس یې واردات په ټپه درېدلي دي.
خدانظر وایي، له افغان کارګرو سره یوشمېر سیمهییزو کارګرو هم کار کاوه؛ خو د هغوی له وتلو وروسته دغه کسان هم بېروزګاره شوي دي. هغه زیاته کړه، پخوا به په کوټه کې ډېرې غالۍ اوبدل کېدې؛ خو اوس نه یوازې دا چې تولید یې کم شوی؛ بلکې د غالیو کیفیت هم ټیټ شوی.
هغه وایي، سیمهییز کارګر د افغان غالۍ اوبدونکو په څېر مسلکي تجربه نهلري. د نوموړي په وینا، مخکې به په افغانستان کې هم د دوی لپاره غالۍ اوبدل کېدې او بیا به پاکستان ته راوړل کېدې؛ خو د لارو د تړل پاتې کېدو له امله اوس دغه چاره هم په ټپه درېدلې ده.
د یادونې ده، چې د کوټې د سبزل روډ، کمالو، بشیر څلور لارې، سملۍ او غوثاباد په ګډون په بېلابېلو سیمو کې ګڼ شمېر افغان کډوال د غالۍ اوبدلو په صنعت بوخت وو. د دوی په لاس اوبدل شوې غالۍ نه یوازې د پاکستان بېلابېلو ښارونو ته؛ بلکې د نړۍ ګڼو هېوادونو ته هم صادرېدې او د لوړ کیفیت له امله یې ښه بازار درلود. خو د دغه سیمو څخه د افغان کډوالو له وتلو وروسته د غالۍ اوبدلو صنعت سخت اغېزمن شوی او د دغه دودیز صنعت د لهمنځه تلو اندېښنې زیاتې شوې دي.
