د هلمند ولایت د لښکرګاه ښار په بولان سیمه کې د «وطن غږ» په نوم یوې نوې سیمه ییزې خصوصي راډیو پر اف ام څپو په فعالیت پیل وکړ. د دې راډیو د نشراتو مدیر ویلي، چې د دوی موخه اسلامي او ملي ارزښتونو ته کار کول او هلمندي ولسونو ته په دیني، ښوونیزو او اقتصادي برخو کې خدمت کول دي.
د طالبانو د اطلاعاتو او کلتور وزارت نن شنبه، د چنګاښ پر ۲۷مه ددې راډیو د یو مسوول له قوله ویلي، چې د دغې نوې راډیو ټول کارکوونکي به پوره هڅه وکړي چې په دیني، ښوونیزو، اقتصادي او ټولنیزو برخو کې ولس ته بېلابېلې خپرونې وړاندې کړي.
په هلمند کې د طالبانو د اطلاعاتو امر د دغې نوې خصوصي غږیزې رسنۍ د فعالیت پیل د خوښۍ ځای بللی دی.
د نوموړي د معلوماتو له مخې، اوس مهال په هلمند ولایت کې ۲۴ انځوریزې، غږیزې او چاپي رسنۍ په بېلابېلو برخو کې فعالیت کوي.
یاد طالب چارواکي د ټولو فعالو رسنیو له مسوولینو غوښتنه کړې چې په خپلو خپرونو کې اسلامي ارزښتونه په پام کې ونیسي.
یادې خصوصي راډیو داسې مهال په فعالیت پیل کړی، چې د طالبانو له واکمنېدو راهیسې لسګونه بېلابېلې رسنۍ او په ځانګړي ډول سیمهییزې راډیوګانې، نه یوازې د اقتصادي ستونزو، بلکې د طالبانو د سختو محدودیتونو او پر رسنیو د لګول شوي سانسور له امله له فعالیت څخه پاتې شوې او تړل شوې دي.
